Shillong, Lber 09
Ka Federation of Meg-halaya Self Help Groups & Mahila Mandals (FMSHG&MM) ha ka lah sngi u Blei ka la mih shakhmat ban pynpaw ïa ki jingïakynduh jingeh jong ki namar ka jingbym siew ka Sorkar ïa ka bill kaba la palat 15 bnai bad dawa ruh na ka Sorkar ban pyllait noh ïa katei ka ‘Arrear’ ba dang sah.
Haba kren sha ki nongthoh khubor, ka General Secretary ka FMSHG&MM, Kong N. Warbah ka la ai khublei ïa ka Sorkar Jylla kaba la shaniah ïa ki palat 100 tam ki SHG ban long kum ki nongpynpoi ïa ki marbam sha ki Integra-ted Child Development Services (ICDS), hynrei ka la ong ba ka Sorkar ka sngap mynthi ban pynbeit ïa ka jingeh.
Ka Kong Warbah ka la ong ba ka Federation ka kwah ban wanrah sha ki paidbah ïa ka mat jong ka jingsiew kaba la sahteng la slem bha, naduh ka Quarter ba 3 jong u snem 2024 bad ruh naduh ka Quarter ba 4 jong u snem 2025 kaba ka Sorkar haduh mynta ruh ka khlem pat siew, ha kaba ki la dep ban trei ïa ka kam.
Nalor kata ka la kdew ruh ïa ka jingbym ïoh jingsiew ki nongïoh jingmyntoi ba khlem don u Aadhaar katba kiba don Aadhaar ki la ïoh ïa ka jingsiew lyngba ka skhim POSHAN kaba dei jong na ka Sorkar Pdeng.
Ka Kong Warbah ka la ong ba ka jingpynslem ban siew ïa ki bill bad ka jingpynneh sah ka Sorkar ïa ka bai kit kaba la rim bha kata ha ka dor T.0.40 paisa na ka bynta u wei u nongïoh myntoi na man ka shi kilometer, ka pynlong ïa ka jingkynduh jingeh kaba jur ïa ki.
“Ka Federation kam lah ban pyndap ïa ka jinglut jingsep ha ka leit ka wan, ka jinglut ha ka bai umphniang bad kiwei de haba ïadei ka jingpynbiang ïa ki marbam.”
Ka Federation ka pynrem jur ba ka tnat Directorate of Social Welfare ka la pyntieng pynsmiej ïa ki haba ki leit ban pan ki lad jingïarap lyngba u Additional Director u ba la ong ba kin sangeh noh ïa ka jingtrei bad ka jingshakri jong ki lada kim lah ban shah bad ban kit ïa ki jingkit bad u ba la pynpaw ba kin don da kiwei pat ki ban shim ïa ka kam jong ki.
