Shillong, Lber 09
Ka State Youth Wing jong ka Voice of the People Party (VPP) ka la leit ban pan jingshai na ka Deputy Commissioner ka East Khasi Hills District halor ka jingduh thoh eksam District Selection Committee (DSC) ki samla ba la long myn ha ka 7 tarik Lber 2026.
Kane ka jingduh thoh exam ki samla kadei namar ba ki poi kham slem bad ym shah shuh ïa ki ban rung ban thoh ïa ka eksam DSC kaba dei ha ka kam ‘Peon’, kaba la jia ha ki artylli ki jaka pynlong thoh eksam kata ha KJP Girls Higher Secondary School, Jaïaw bad ha Jailroad Boys’ Higher Secondary School, Shillong.
Ka Voice of the People Party haba ïadei bad kane ka bynta ka la aiti ruh da ka jingthoh ha ka Deputy Commissioner ka East Khasi Hills District ka Kong R. M Kurbah ban ai jingmut ban kham pynbun ïa ki jaka thoh eksam ha kylleng ka District khnang ba kum kine ki jingjia kin ym jia shuh ha ki por ban wan.
U Bah Marbud Dkhar, President ka VPP State Youth Wing haba kren sha ki nongthoh u la ong, kum kane ka jingjia kam dei kaba dang jia tang mynta, hynrei ka la dei ka sien ba ar ba ki khynnah kiba la pynkhreh ban ïakhun ïa ka eksam DSC lane kiwei ruh ki eksam thungkam ka Sorkar ba ki hap ban phai ïamrem khlem da ïoh ban thoh eksam namar ka jingslem jong ki ban poi tang da ki minit ha ki jaka thoh eksam.
U la ong, ka East Khasi Hills District ka dei kaba ïar bha namar kata ki khynnah ki wan na ki jaka ba jngai kum na Mawsynram, Sohra, Pynursla bad kiwei, ha lynti ruh ki kynduh ïa ka jingsahkut kali, namar kata ka VPP ka la kyrpad ïa ka DC ban buh kham bun ki jaka thoh eksam ba kan long ka jingpynsuk ïa ki khynnah bad ban nym jia shuh kiba kum kine ki jingjia ha ki por ban wan. U Bah Marbud u la kyntu ruh ïa ki samla ba pynkhreh ban ïakhun ïa kino-kino ki eksam thungkam ba la khot pynlong da ka Sorkar ne ha kiwei ki eksam ruh ba kin poi ha ki jaka thoh eksam ha ka por kaba biang.
