Shillong, Lber 09
Kum shi bynta ban tehlakam ïa ki jingjia jong ka jingïakynad jaidbynriew hashuwa jong ka ilekshon GHADC ha Ri-lum Garo, la pynjari bad khang ïa ki lad pynïasoh ‘Internet’, da u Principal Secretary ka Sorkar Jylla ha baroh kawei ka distrik jong ka WGH.
Ha katei ka hukum, u PS u la kdew ïa ka kaiphod jong u DC ka WGH, u Vibhor Agarwal bad u SP, u Abraham T. Sangma kiba la pyntip halor ki katto-katne ki jingjia kiba la jia ha Tura ha kaba ïadei bad ka mat ban thep kyrteng na bynta ka ilekshon GHADC.
“La ïoh jingtip ruh na u DC bad SP ka WGH ba katto-katne ki jingjia ki lah ban pynthut ïa ka suk ka saiñ jong ki paidbah ki la jia ha Tura ha kaba ïadei bad ka jingthep kyrteng na ka bynta ka ilekshon GHADC bad ba katto-katne ki jingjia la ïathuh ba ha Tura kiba lah ban buh jingma ïa ka jingshngaiñ ki paidbah bad kiba lah ban pynthut ïa ka jinglong-jingman ha ka shong suk shong shngaiñ.” la pynpaw ka hukum.
“Kine ki khubor ki la pynpaw ba ki la don katto-katne ki jingjia jong ka jingshah thombor jong ki ‘riew paidbah, ka jingïalum lang jong ki paidbah bad ka jingpynphriang ïa ki jingtip kiba bakla lyngba ki rynsan ‘social media’ kum ka ‘Facebook’, ‘X’ (Twitter hashuwa), ‘YouTube’, ‘Instagram’ ki lah ban shah pyndonkam ban pynsaphriang ïa ki jingtip lyngba ki dur ki dar, dur-khih ki ‘text’ kiba lah ban wanrah ïa ka jingbym shong suk shong shngaiñ ha ka imlang ka sahlang,” la bynrap biang ka hukum.
“Khnang ban khanglad ïa ka jingpyndonkam bakla ïa kine ki rynsan ‘social media’ ba la kdew haneng kiba lah ban pynthut ïa ka shongsuk shongsaiñ, nga pynbna ïa kane ka jingpynbna katkum ka kyndon Section 5 (ii) jong ka Indian Telegraph Act, 1885, ba la pule ryngkat bad ka Temporary Suspension of Telecom Services (Public Emergency or Public Safety) Rules, 2017, ban khang ïa ki rynsan ‘social media’ kaba 48 kynta kaba sdang naduh ka por 12 baje mynstep jong ka 10 tarik u Lber ha West Garo Hills District,” ong ka hukum ba la soi da u Bah F.R. Kharkongor, Principal Secretary sha ka Sorkar Jylla.
Kane ka jingbthah ka ïadei bad ki ‘mobile internet data services’ sha baroh ki nongpynbiang ïa ki lad jingshakri ‘Mobile’.
