Jowai, Lber 10
Ka Jaiñtia Students’ Union (JSU) ha ka 10 tarik Lber ka la dawa ban kyndang noh mardor ïa ki nongwan buhai shnong be-aiñ ha Lakroh bad ban weng ïa ki kyrteng jong ki bym dei trai shnong na ka thup kyrteng ki nongthep ‘vote’, bad pyntreikam mardor ïa ka Inner Line Permit (ILP) hadien ba 4 ngut ki trai-muluk ki la shah thombor ha Hawai Sutnga.
Ha u kyrwoh, u Edu-cation Secretary ka JSU, u Bah Bocheru Mi Pohsnem ba ka kynhun wad bniah ba ïatreilang jong ka Central Body bad ka Syndai Unit ka la leit jngoh ïa ka Lakroh ha ka 9 tarik Lber ha kaba ka la shem ba haduh 95% na ki nongshong shnong kim dei satia ki ‘riewlum bad kiba don ïa ki kot ki sla ban shong shipor hynrei kiba la pynskhem ïa ki jaka sah jong ki.
“La pynlong atiar ïaleh ïa ka jingïaishah jong ngi, ngi kyntait ban long ki phetwir ha la ka jong ka Jylla,” u la ong bad bynrap ba “lada ka Sorkar ka pulom ban ïada ïa ka khyndew ka shyiap jong ngi, ngin sa pynlong da ka jingïakhih kaba jur ha ka Jylla baroh kawei,” maham u Bocheru Mi.
Ka Seng ka la buh ïa ki hynñiew tylli ki mat jingdawa ba kynthup ban kem mardor ïa baroh kiba donkti ha katei ka kam thombor, ka jingpynduh ïa ki NOC bad kyndang ïa ki nongwan buhai shnong be-aiñ na Lakroh, ban pyndam ïa kiba bat EPIC/Aadhaar na ka thup kyrteng thep ‘vote’, ban khangdam ïa ka Mandir ba la tei be-aiñ kaba pynkheiñ ïa ka hukum u Dalloi/SDO jong u 2024, ban pynduh ïa ki jinglehthok ban ïoh ïing lyngba ka PMAY bad ki ‘Job Card’, ka jingtalasi ba pyrkhing katkum ka MRSSA bad ka jingpyntreikam ïa ka ILP nalor ka jingker sainar ïa ki jaka khappud ba la sahteng naduh u snem 2025.
U ophisar ba pynlong jingtohkit, u SI Rymbai ka Muktapur Outpost u pyntip sha ka kynhun ka seng ba kumba 4-5 ngut ki suba donkti la lah ban ithuh ba mynta ki dang pynlong ka jingbeh thong ban kem ïa ki.
“Katba ngi dang khmih ïa ka jingïaid jong kane ka kam, ka jingithuh ïa ka kam pat biang satia. Ngi dawa na ki pulit ban kem mardor ïa uwei-pa-uwei u ‘riew khawpud uba donkti ha kane ka kam thombor bad ban pyntikna ban pynngat ha ka jingpynshitom ba tyngeh katkum ka aiñ. Ka Sorkar ka dei ban pyntikna ïa ka jingshngaiñ jong ki trai shnong. Ngin ym shongthait tad hadien ban da pynïoh ïa ka jingbishar hok,” ong u nongïalam ka seng.
U la pynkynmaw ruh ba ha u snem 2024 ka JSU Syndai Unit ka la rah ïa kane ka mat kaba ïadei bad ka jingtei be-aiñ ïa ka Mandir ha Lakroh.
“Na ka liang u Dolloi bad SDO ka Amlarem ki la ai ïa ka hukum kaba shai ban pynsangeh ïa baroh ki jingtei. Hynrei haba ngi leit jurip ïa katei ka jaka ha ka 9 tarik Lber, la pyndep ïa ka jingtei. Kane ka dei ka jingbym kheiñ snep bad ñiew be-aiñ ïa ki bor synshar bad ïa ki riti-dustur jong ngi. Ngi dawa na u SDO ba u dei ban tuklar mardor, ban khangdam ïa kane ka jingtei be-aiñ bad ban pynshitom tyngeh ïa kito kiba pynkheiñ ïa ka aiñ,” u la bynrap.
U la ong ruh ba ka seng ka dawa ïa ka jingtohkit ba mardor da ki bor ba halor bad ban weng mardor ïa man kawei-pa-kawei ka ‘Job Card’ ba la ai thok bad pynduh noh ïa ka jingai ïing PMAY ba la mang sha ki bym dei ki nongshong shnong.
Haba kynthoh tyngeh ïa ka jingpulom jong ka Sorkar ban ïada ïa ki shnong ha ki thaiñ khappud, ka JSU ka la ong, “Ngi dawa jur halor ka jingpyntreikam tyngeh ïa ka aiñ MRSSA khnang ban khanglad ïa ki suba bar-ri bad ngi pynkynmaw ïa ka Sorkar ba ka jingpyntreikam ïa ka ILP kam dei shuh tang ka jingdawa, hynrei ka dei ka jingdonkam ba kyrkieh ban ïada ïa ki trai ri trai muluk.”
Nalorkata, ka la ong ruh ba ka Sorkar Pdeng bad Sorkar Jylla ki dei ban kyndit bad shim mardor ïa ki sienjam ban pyndep noh ïa ka jingker sainar ha lynter ki jaka khappud ka India-Bangladesh.
