Shillong, Lber 10
U Bah Roykupar Synrem, President ka Hynñiewtrep Youths Council bad Chairman ka Confederation of Meghalaya Social Organization (COMSO) u la ong ba ka jingjia shah hiar thma ïa ki jaitbynriew ha Rilum Garo ka long ka jingma kumjuh ïa ka jaidbynriew Hynñiewtrep.
Kane ka jingïakynad hapdeng ki jaitbynriew Garo bad ki bym dei ki riewlum Garo ka la sdang ha ka miet jong 09 tarik u Lber, 2026 bad ka la ïai bteng haduh mynta ruh.
Haba kren sha ki lad pathai khubor ha ka 10 tarik u Lber, 2026, u Bah Roykupar Synrem u la ong ba ki bseiñ kin puh beit haba la pynsyaid ïa ki bad kumta ha ki jaka ri thor ka West Garo Hills ki bym dei riewlum ki la kham bun paid ban ïa ki riewlum bad kane ka dei hi na ka jingbymdon jingkitkhlieh ki nongïalam barim.
U Bah Roykupar, u la shim nuksa na ka jingjia shah pynïap u nongïalam ka sengbhalang ACHIK, u Dilseng M Sangma ha ki bar jylla kiba wan trei ha ki jaka tih maw ha Rajabala.
“Bun ki jaka ha ki thaiñ Garo kiba la bun sa tang ki briew ki bym dei ki riewlum ban shong ban sah bad kane ka dei ka jingma kaba khraw. Ngi na ka HYC bad na ka COMSO ngi la dep ban kren na ka por sha ka por halor ka jingïoh rung beaiñ ki briew ba nabar hynrei kane baroh ka dei hi ka jingbakla jong ki nongïalam barim jong ka Jylla,” u la ong.
U la ong ba mynta kine ki briew ki la kam trai syndon ïa ka khyndew ka shyiap bad mynta ki la kam trai syndon ïa ka jinglong trai shnong da kaba leh ïa kum kine ki kam.
“Ngi ïohi ïa ki durkhih ki bapher bapher kiba la pyrta da ki slogan jong ki, kiba ngim lah ban mutdur ba kin pyrta hangne hapoh ka Jylla jong ngi kiba dei ki slogan pyrta ha kiwei pat ki ri. Kane ka dei ka dak ka shin kaba pyni ïa ngi baroh, la ka long ki jaitbynriew Garo ne Khasi-Jaiñtia ba lada ngim kyndit bynriew bad ngim ïakhun mynta kan sa don ka jingma kaba khraw,” la ong u Bah Roykupar Synrem.
Katkum ka jingïathuh ki paralok Garo sha ka seng kiba don lang ha ka shatri jong ka COMSO, ba ka jingïakhih ka nangjur namar ba kine ki briew bym dei ki riewlum ki dangïai pyni bor, da kaba kdew ruh ba ki Garo ki la hap ban phet shnong na ki bynta ka thaiñ ha Rilum Garo namar ba la bun palat ki briew bym dei ki riewlum kiba sah.
Kumta u la ong ba na ka liang ka COMSO ka don ha syndah bad ki jaitbynriew Garo, kiba dawa ban beh ïa kitei ki briew kiba sah beaiñ ha kitei ki jaka bad ka jingïakhun jong ki jaitbynriew Garo kaba hakhmat eh ka long ba kine ki briew kim dei ban don bynta ha ka ilekshon ha GHADC.
“Ki Garo ki don ïa la ka jong ka hok ban dawa, namar ba kumno ki briew ki bym dei ki trai ri trai muluk ki lah ban don bynta ha ka ilekshon MDC ha GHADC. Kan don jingmut aiu ba kan don ka Garo Hills Autonomous District Council ka ban peit ïa ka riti dustur u Garo ba un shong bad thaw aiñ da u briew u bym dei u Garo. Ka jingdawa jong ki paralok jong ngi na Garo ka dei kaba shong nongrim,” la bynrap shuh shuh u Bah Roykupar.”
Na ka jingjia shah hiar thma ki Garo, ka COMSO ka la pynbna ban pynlong da ka jingïalang paidbah ha Motphran ha ka 11 tarik u Lber, 2026, ban ai mynsiem ïa ki jaidbynriew Garo.
