Shillong, Lber 10
U Bah Maxdor G Syiem u ba long kum u Outreach Educator ka Faith Foundation, u la ïathuh ba ki don haduh 556 tylli ki jingjïa shah thombor ki khynnah, kata naduh u bnai ïaiong 2024 haduh u bnai Rymphang 2025 bad na kine 86 tylli ki jingjia ki dei kiba jia ha East Khasi Hills District.
U la ïathuh ba kane ka dei katkum ka jingïoh jingkheiñ jong u na ka tnat pulit ka Jylla Meghalaya bad u lab pynpaw ïa kane ha ka ‘Grand Child Well-being Mela 2026’ kaba la pynlong da ka Faith Foundation ha All Saints Hall, Shillong ha ka sngi Ba-ar.
Ka jingpynlong ka Faith Foundation ïa kane ka ‘Grand Child Well-being Mela 2026’ ka dei halor ka jingthmu ban kyntiew ïa ka jingim ba bha, ka jingshngaiñ bad ban ai ki lad jingïada ïa ki khynnah na ki jingshah thombor.
U Bah Maxdor G Syiem u la ong ba bunsien ki nonghikai bad ki nongkitkam ha ki shnong ki thaw kim tip kumno ban leh haba ki khynnah ki ïakynduh ïa kum kine ki jingjia bad bunsien ka shu kut tang ha ka jingïapeiñ. Kumta, dei halor kane ka nongrim ba ka ‘Faith Foundation’ ka pynlong ïa ki jingïalap paidbah bad ki jingai jinghikai ha ki shnong ki thaw ban ai jingshai ïa ki paidbah bad ban hikai ruh kumno ban ïarap ïa ki khynnah kiba ïakynduh ïa ka jingshah thombor.
Na ka liang u Bah Banteilang J Kharshandi, MCS, Director of School Education & Literacy, Meghalaya, u la ong ba ka jingshngaiñ bad ka jingïada jong ki khynnah ka dei ka bynta kaba kongsan bha ha ka imlang ka sahlang bad ban jur da kaba ong ba kam dei tang ka kamram jong ki kmie ki kpa ne ki shlem ai jingstad, hynrei ka donkam ïa ka jingkitkhlieh lang jong baroh ki nongshong shnong ban pynthikna ba ki khynnah kin im ha ka jingïada bad jingshngaiñ ha ki skul, ha ki ïing ki sem bad ha ki shnong ki thaw.
Ha kane ka prokram la wan shim bynta da ki khynnah skul jong ki 36 tylli ki skul na kylleng ka nongbah Shillong, ki nonghikai skul, ki ophisar Sorkar bad ki riew paidbah.
