Shillong, Lber 10
U SP ka West Garo Hills, u Abraham T. Sangma u la pyntikna ba arngut ki briew ki la ïap ha ka jingther kuli jong ki pulit ha ka step Sngi Ba-ar katba ki ophisar ki dang beh bad pynpra ïa ka jingïalang be-aiñ ha ka por ba dang pynjari ïa ka korphiw miet.
Kane ka jingjia ka la jia hadien ka jingïatyngkhuh hapdeng ki kynhun ‘riewlum bad ki bym dei ‘riewlum hapdeng ki jingïakynad kiba nang jur ha kaba ïadei bad ka jingthep kyrteng na ka bynta ka ilekshon sha ka Garo Hills Autonomous District Council (GHADC) ka ban long ha ka 10 tarik Ïaïong.
“Ki dei ki nongshong shnong jong ka Chibinang. Ka la don ka jingïakynad hapdeng ki ‘riewlum bad ki bym dei ‘riewlum ha kaba ïadei bad ka ilekshon GHADC, bad ka jingsiat suloi ka la jia ha ka por ba ngi dang pynpra ïa ka jingïalum paidbah kaba long be-aiñ,” la ong u Abraham.
“Ka jinglong-jingman mynta ka don hapoh ka jingtehlakam,” u la bynrap.
Ki bor distrik ki la pynjlan ïa ka korphiw sha ka jingkhang-dam kaba baroh shisngi ha kylleng ka West Garo Hills bad hukum shuh ïa ki bor pahara ban ïada bad ban tem ïa ka jingnang jur jong ka jinglong-jingman.
“Ngi la pan shuh ïa ki bor pahara bad ki dang don ha lynti,” la ong u Sangma.
Kane ka jingjia ka la jia katto-katne kynta hadien ba ka Sorkar Jylla ka la hukum ïa ka jingkhang ïa ki ‘Mobile Data Service’ kaba 48 kynta naduh ka shiteng synñia jong ka 10 tarik u Lber, da kaba kdew ïa ki khubor na u Deputy Commissioner bad u SP halor ka jingïalum paidbah, ki jingshah thombor bad ki jingpyntip ba bakla ha ki rynsan ‘social media’ kiba buh jingma ïa ka suk ka saiñ ha ka por ba thep kyrteng. Ki jingkren ne ‘Voice Call’ bad ki ‘SMS’ ki dang sah kumjuh khlem kano-kano ka jingshah ktah.
U Deputy Commissioner, u Vibhor Aggarwal u la khot ruh ïa ka jingïalang ‘Peace Committee’ ha Circuit House, Tura, ha kaba yn khot lang ïa ki nongïalam balang, ki nongïalam NGO bad ki komiti pynroi shnong da ka jingthmu ban pynthanda ïa ka jingkulmar.
Ha kajuh ka por, la pynkhlaiñ ïa ka jingpahara ha ki jaka thep kyrteng katba ka jingthep kyrteng ka dang bteng haduh ka 16 tarik u Lber.
Ka jingkulmar ka la sdang hadien ba la kynnoh ba u nongmihkhmat barim ka Phulbari, u Estamur Mominin u la shah thombor ha ki nongïakhih ha ka por ba u la poi ha ophis u Deputy Commissioner ha Tura ban thep kyrteng na ka bynta ka ilekshon GHADC.
Ki nongïakhih ki la dawa ïa ki bym dei ‘riewlum ban kiar na kaba ïakhun bad ïashim bynta ha ka ilekshon GHADC.
Ha ka 17 tarik u Rymphang, ka Executive Committee ka GHADC ka la mynjur ïa ka rai kaba pynlong kongsan ïa ki kyrtong ban pyni ïa ki syrnot ST.
