Shillong, Lber 10
U Nongaiktien ka Voice of the People Party (VPP), u Dr. Londoner Murphy Sohtun, ha ka 10 tarik u Lber 2026, u la ong ba ka seng ka pynrem jur halor ka jingjia shah hiar thma ki jaitbynriew ha Rilum Garo.
Ha ka kyrwoh ba la phah u Dr. Londoner u la ong ba ka seng VPP kam pdiang da lei-lei ïa kino-kino ki kam leh donbor, hynrei ka pynrem jur halor ka jingpyni bor ba thmu pyrshah ïa ki trai riewlum ha Garo.
U la kdew ruh ba kane ka buh ïa ka jingma ha ka jingshongsuk bad ka jingshngaiñ ha katei ka thaiñ baroh kawei.
“Ka GHADC ka dei kaba la thaw ïa ki aiñ bad ki rai na ka bynta ki trai riewlum bad na ka liang ka seng ngi ngeit skhem ba ha ka jingthep vote jong ki trai riewlum sha ka GHADC ka dei ka hok jong ki ban ïa shim bynta,” la ong u Dr. Londoner.
Shuh shuh u la ong ba ka seng ka ai jingkyrshan na ka bynta ki trai riewlum Garo ba kin ïeng na ka bynta ka hok jong ki.
U ong ba kum ka party kam ïashah ïa ki kam ïaum-snam bad kam dei ruh ka lynti ban ïoh ïa ka hok katkum ka Riti Synshar ka Ri India bad bynrap ba hap dei ban burom ïa katei ka hok ki jaidbynriew Garo.
Da kaba pynpaw ba ka rukom ïakhun ban ïoh ïa ka hok katkum ka Riti Synshar ka dei lyngba ka sienjam kaba jai-jai bad lynti saiñ-hima, u Bah Londoner u la ong ba ka Party ka kyntu ïa ki bor ba pyntreikam ïa ki aiñ ban tohkit halor ki jingjia kaba lam sha ka jingkynad bad jingïa umsnam.
