Shillong, Lber 10
U Bah Thomas Passah uba dei u Working President ka Khun Hynñiewtrep National Awakening Movement (KHNAM) u la ong ba ka jingjia ha Rilum Garo ka pynlong ïa ka Khasi Hills Autonomous District Council ba dei ban pynkhlain ïa ki kynroh.
Kane ka jingpynpaw u Bah Thomas ka dei haba ïakren bad ki nongthoh khubor mynta ka sngi ka 10 Lber 2026 hadien ba ka seng ka la leit buh da ka jingthoh sha u Chief Executive Member ka KHADC u Bah Winston Tony Lyngdoh namar ka jingbym don ha ophis.
U Bah Thomas u la ong ba ka jingleit kynduh ka KHANM ïa u CEM ka long ban pynkynmaw biang ïa ka Khasi Hills Autonomous District Council halor ka jingdawa ban pynkylla ïa ka AD Rules kaba 128 sub para (1) bad sub para (3).
U la ong hadien ba la mih ka jingïakynad ha Rilum Garo ban nym shah shuh ïa ki bymdei Garo ban ïakhun ilekshon MDC, ka la wanrah pynban ka jingïap briew bad ki jingmynsaw, kumta ka seng da ka jingsngewkhia ka la wan biang ban pynkynmaw ïa ka KHADC halor ka jingdonkam ban pynkylla noh mardor ïa ka AD Rules ka ban khanglad ïa ki bymdei riewlum ban ïoh thep vote.
Shuh shuh u la ong ruh ba ka seng ka la pynbiang lypa ruh ïa ki ‘amendment’ ban pynsuk ïa ka EC halor ka jingpynkylla ïa ka AD Rules.
U la ong ba ka jingjia ha Garo Hills kadei lehse ba ki MDC kim shym la pynkhlaiñ ïa ki aiñ hapoh District Council, kumta u la kyntu ïa ka EC ha KHADC ba kan shimkhia halor kane ka mat bad lada ka lah kum ka jaidbynriew ki hap ban ai ka jingïaroh ïa kane ka EC.
U la kyntu ïa u CEM ba un jubab ïa kane ka shithi kaba ka KHNAM ka la phah namar lada ki lah ne kim lah ban shna aiñ ruh ka seng kan ïoh ban pyrkhat da kiwei ki kam ban leh.
