Shillong, Lber 10
U Samla Lambokstarwell Marngar, President ka Khasi Students’ Union (KSU) u la kdew ba ka jingnud bad pyni bor kiwei ki jaitbynriew bym dei riewlum ha Rilum Garo kiba rung hapoh u pud u sam ka Jylla kiba wan buhai shnong lyngba ka khaïi pateng kadei namar ka jingbym biang ki aiñ ban ïada.
Ïa kane u Samla Lambokstarwell Marngar u la pynpaw hadien ka jingjia ïakynad hapdeng ki riewlum Garo bad ki bym dei ki riewlum kaba la sdang ha ka 09 tarik u Lber 2026, halor ban pyrshah ïa ka jingthep vote bad thep kyrteng ki briew bym dei ki riewlum Garo ha ka ilekshon ha Garo Hills Autonomous District Council (GHADC) ka ban sa long shen.
Ka KSU lyngba u Samla Lambokstarwell Marngar ka ai ka jingkyrshan ïa ka jingïakhih ki paidbah riewlum Garo ha West Garo Hill kaba la jia ka jingïakynad mynta bad kiwei ki jaitbynriew ki bym dei ki riewlum.
U Samla Lambokstarwell Marngar ula ong kane ka jingpyni bor kiwei ki jaitbynriew bad leh baheh kadei namar ka jingtlot ki bor Sorkar kaba leh kyllut khlem patiaw ïa ki mat jingdawa na ki kynhun sengbhalang kum ki aiñ ïada kum ka Inner Line Permit (ILP).
Kumta u la kyntu ïa baroh ki riewlum Khasi-Jaiñtia bad Garo kiba na kane ka Jylla Meghalaya ba kin long kiba husiar ba kim dei ban ai lad ba kiwei ki jaitbynriew kin knieh ïa ka khaïi ka pateng.
“Dei ban kiar ruh ha ka shongkha shongman bad ba ym dei ban ri ïa ki bseiñ hapoh ki kamra namar ynda u bseiñ u la syaid un sa puh kylla ïa ka jaitbynriew,” la kyntu u Samla Lambokstarwell Marngar.
Shuh shuh u Samla Lambokstarwell Marngar u la ong ba kiwei ki jaitbynriew ki wan sahuh hapoh ka Jylla ban knieh ïa ka khaïi pateng bad ruh ban knieh ïa ka synshar ka khadar jong ki trai ri trai muluk.
Ha kum kane ka jingjia ïakynad ha Rilum Garo ka Sorkar Jylla, ki bor pulit ki dei ban kyndit bynriew ban pyntreikam ïa ki aiñ ïada, ba kiwei ki mynder kim dei ban rung buhai shnong namar ynda ki la sngew baheh bad bun paid kin pyni ruh da ka bor ïa ki trai muluk.
U la byrngem ruh ba lada ki bor synshar kim kyndit bynriew mynta bad jia lada mih kino-kino ki jingïakynad, ka KSU kan sdang ïa ka lynti bad ki sienjam bad kan sa pynkut.
