Shillong, Lber 10
U Bah Dundee Cliff Khongsit, President ka Federation of Khasi Jaiñtia and Garo People (FKJGP) u la pynrem jur ïa ka jingshah thang ka ophis treikam ka seng Garo Students’ Union (GSU) ha Chibinang hadien ba mih ka jingïakynad hapdeng ki paid riewlum Garo bad ki bym dei ki riewlum ha katei ka thaiñ.
“Ngi ai ka jingkyrshan ba pura ïa ki para riewlum Garo kiba ïakhih namar ka jingïohlad kiwei ki jaidbynriew bym dei riewlum ban ïoh thep vote bad ban ïakhun ïa ka ilekshon MDC ha GHADC,” la ong u Bah Dundee haba kren sha ki lad pathai khubor ha ka sngi Ba-ar jong ka taïew.
U Bah Dundee Khongsit u la ong ba ka jingshah shoh u MLA barim ka Phulbari, u Esmatur Mominin ka dei namar ka jingnang pynkhluit ïa ka jingsngew ki paidbah ka Rilum Garo ban khang noh ïa ki bym dei ki riewlum ban ïakhun ïa ka ilekshon MDC ha GHADC.
U Bah Dundee u la ong ba ka GHADC ka la pass ïa ka hukum ha ka 09 tarik u Rymphang 2026, kaba la pynmih ha ka 17 tarik u Rymphang 2026, ba la sngewdei ban ym ai lad shuh ïa ki bym dei ki Garo ban shim bynta hapoh GHADC, hynrei kane ka jingleh u tei u Esmatur Mominin ka long ban pynkhluit ïa ka jingsngew jong ki paid Garo.
“Da lei-lei ruh mardor ngin nym ai lad ïa ki briew ki ban ïashim bynta ha kane ka ilekshon ha GHADC ki bym don ïa ka syrnot Schedule Tribe,” u la ong.
Shuh shuh u ong ba kane ka kam ka dei kaba la dier palat ban ïakren hynrei sngewtynnad pat ba ki paid Garo mynta ki la sngewthuh ïa kine ki jingeh ki ban ap ïa ki lada ki ailad ïa kiwei pat ki jaitbynriew ban ïashim bynta khamtam ha ka ilekshon ha GHADC. Namar lada ïohlad kine ki bym dei ki riewlum ban shim bynta ha ka ilekshon GHADC kan pynïap noh ïa ka hok jong ka Six Schedule.
“Lada ngin ai lad ïa kine ki briew ki bym dei ki jaitbynriew riewlum ban rung ha ka ilekshon ha GHADC khamtam ba ki dei ki muslim bad lada kin jop 4 ne 5 ngut ki kyrtong kan sa don jingma ym dei tang ïa ki paidbah ha Garo Hills hynrei wat shaduh Rilum Khasi bad Jaiñtia baroh kawei,” la bynrap u Bah Dundee khongsit.
