Shillong, Lber 10
U wei u rangbah uba shong basah ha Pynursla, ïa uba la tip kyrteng u Bah Glorious Swet uba la thok pisa sha kiba bun ki samla da ki phew lak tyngka, u la shah bat noh ha ki dkhot ka seng Khasi Students’ Union, Jaïaw Lansonalin Unit ha ka janmiet jong ka sngi Ba-ar, ka 10 tarik u Lber 2026, ha Robert Hospital.
Kane ka jingïoh bat ka seng KSU ka dei hadien ba ki la ïoh ka jingujor na ki katto-katne ngut ki samla pule kiba la shah thok pisa ha une u briew bad ban bthah ba kin phone ïa u ban ïakynduh ha Robert Hospital.
Une u rangbah u la thok ïa ki samla da kaba kular ban pynïoh pule MBBS ïa ki sha ka Skulbah USTM da kaba pan pisa da ki phew lak tyngka na ki.
Katkum ka jingphla jong une u rangbah la ong, ba u la thok pisa lyngba ki whatsapp sha ki samla bad lyngba kawei ka kot kaba u la shna hi kaba dei na ka Meghalaya Legislative Assembly Secretariat ban pynshisha bad ban pynngop ïa ki khun samla.
Une u rangbah u la ïathuh ba u la leh ïa kane ka kam thok naduh mynshem snem ban thok ïa ki samla ban pynïoh jaka pule ha katei ka Skulbah USTM.
“Nga leh ïa kane ka kam dei namar ba nga la ngop eh ha ki kam awria bad ban ïoh khalai,” la ong une u rangbah.
Haba kylli, une u rangbah u la ïathuh ba um shym la don kano-kano ka jingïadei bad u Chancellor ka Skulbah USTM hynrei la shu thok sha ki samla tang ban kamai pisa bad ban shu shim kabu ïa ki.
U la ïathuh ruh ba ïa kane ka pisa ba u la ïoh kiba da ki phew lak u la pynlut ha ki kam awria da kaba thoh tim bad pynlut ha kiwei-kiwei de ki kam. “Ngam donkti badno badno ruh ban leh ïa kine ki kam hynrei nga leh beit tang marwei,” u la bynrap.
Na ka liang ka KSU Lansonalin Unit lyngba u Samla Babitlang Khyriem u la ong ba ka seng ka ïoh bat hadien ba ka seng ka la ïoh jingujor bad ap shrip haduh ban da ïoh bat ïa u ha Robert Hospital.
U la phah ruh ka kyrwoh sha baroh ki samla ba kin nym ngop ha kum kine ki jait briew kiba shu thok bad shukor, ban pynïoh kam pynïoh jam sha ki samla bad ban pynïoh jaka pule ha ki Skulbah bapher-bapher. Da kaba ong ruh ban husiar khnang ban nym ngop ha kine ki jait briew ki ban bam duh ïa ka kamai kajih.
Hadien kane na ka liang ka KSU ka la aiti noh ïa une u rangbah sha ki pulit ka Lumdiengjri Police Station ba kin leh ïa kaba donkam.
