Shillong, Lber 10
Ki nongtrei ka Maw-mluh Cherra Cements Limited (MCCL) kiba don hapoh ka shatri jong ka Mawmluh Cherra Cements Employees Union (MCCEU) ki la kyntu ïa ka Sorkar Jylla ban pyllait noh ïa ka pisa kaba sah kaba ki dei ban ïoh.
Haba kren halor kane u President ka MCCEU u Bah Pynskhem Lyngdoh u la ong ba ha Dorbar mang tyngka ba la dep u Myntri Rangbah ka Jylla u Conrad K Sangma u la pynpaw ba ïa ka pisa jong ki nongtrei ka MCCL la pyllait.
U la ïathuh ba ha ka 3 tarik u bnai Nohprah ka Union ka la phah jingthoh sha u Myntri Rangbah ka Jylla ban kyrpad pyllait noh ïa ka pisa hapoh jong une u snem.
“Ngi la ïohi ba hapoh ïingdorbar u Myntri Rangbah u ong ba la dep ai ïa ka pisa sha ki nongtrei ka Mawmluh Cherra Cements Limited (MCCL) bad ngi kyrmen ba mynta u bnai Lber ngin ïoh ïa kane ka jingsiew bad lada kam dei kumta ruh ngi don ka jingkyrmen ba kin pyllait noh kham kloi ha ka taïew ba nyngkong jong u Ïaïong,” la ong u Bah Pynskhem Lyngdoh.
Shuh-shuh u la kyntu ïa baroh kiba don bynta lang ban ïarap lem ïa ki khnang ba kin ïoh pdiang noh ïa kane ka jingsiew ba khatduh namar baroh ki nongtrei ki la ap khmih lynti ban ïoh noh ïa kane ka jingpynmang pisa bad pynpaw ruh ba lada ki ïoh ïa kane ka jingsiew ki nongtrei ki la pynkhreh ban jam noh sha kiwei ki lad ki lynti ban trei ïa ki kam ki jam lajong.
Na ka liang u General Secretary ka MCCEU u Bah Arnold Thabah u la kyntu ïa ka Sorkar ba kan pyllait noh kloi katba lah ïa kane ka pisa bad pynpaw ba ki don ka jingkyrmen ba ka Sorkar kan pyllait noh ïa kane ka jingpynmang pisa ba khatduh.
U la pynpaw ka jingsngewnguh ïa ka Sorkar kaba ha ki por kiba la dep bad kaba mynta, da kaba ong ba ki nongtrei ka MCCL naduh ba ki ïoh ïa kane ka pisa na ka Sorkar ki la sdang ïa ki kam kum ha kaba pynïaid ïa ki jaka sah ki nongwan jngohkai pyrthei (Homestay) bad kiba bun ki la sdang ban seng ïa ki kam lajong bad kiwei-kiwei ki kam.
