Shillong, Lber 10
Hadien ka jingpynbna ka Sorkar India ba baroh ki jaka pule, ki prokram ophis Sorkar bad kiwei-kiwei ki jingïalang ki dei ban rwai ïa baroh 6 dkhot jong ka jingrwai Vande Mataram ha kitei ki prokram, na ka liang ka Khasi Students’ Union (KSU) ka pynpaw ïa ka jingpyrshah jur ïa katei ka hukum bad pynsngew ba ka KSU kan ym pdiang da lei-lei ruh em ïa katei ka jingleh donbor ka Sorkar Pdeng.
Ha ka kyrwoh ba la phah da u Samla Donald V Thabah, General Secretary ka KSU u la ong ba ka jingrwai ‘Vande Mataram’ kaba la thaw da u Bankim Chandra Chatterjee ha u snem 1882 ha ka ktien Bengali bad Sanskrit ka don hynriew dkhot bad ha ki dkhot kiba shadien la rwai shaphang ki blei Hindu, kumta ka committee kaba kynthup ïa u Rabindranath Tagore, Maulana Azad, Subhash Bose, Acharya Deva bad u Jawaharlal Nehru ha u snem 1937 kim pdiang ïa baroh ki dkhot katei ka jingrwai bad ai jingmut ba tang ki dkhot ba nyngkong bad ba ar ki ïahap bad ka jingïakhih laitluid namar ki kren tang shaphang ka jaka bad ym ïa ka niam, katba ki dkhot kiba hadien ki kren shaphang ka jingngeit niam Hindu kiba ym ïahap satia bad kiwei ki jait niam bad jaidbynriew.
“Phewse ha ka 6 tarik u Rymphang 2026, ka Sorkar India ka la leh donbor da ka hukum ban rwai lut ïa baroh ki dkhot ka ‘Vande Mataram’ ha baroh ki prokram Sorkar bad ki skul. Kane ka jingleh ka Sorkar India ka dei ka jingleh donbor da kaba phah rwai jingrwai niam Hindu wat ïa kiwei pat ki jaidbynriew kiba dei ki riewngeit jong kiwei pat ki jait niam. Kane ka pyni ba kane ka Sorkar India kaba mynta ka thmu ban pynkylla Hindu ïa baroh ki nong India lyngba kata ka ‘Process of Assimilation’ da kaba phah rwai jubor ïa baroh ki dkhot ka Vande Mataram,” la ong u Samla Donald.
U la kdew ruh ba ka jaidbynriew Khasi kam ïahap bad kam ïa don bynta ei-ei ruh ha kane ka jingrwai Vande Mataram khamtam kito ki dkhot kiba shadien kiba rwai ïaroh ïa ki blei Hindu. Ka jaidbynriew Khasi ka don la ki jong ki jingngeit kum ka Niam Tynrai-Niamtre bad niam Kristan. Kine ki niam ki la long doh long snam naduh ki por kulong kumah bad ha shuwa ban kha ïa ka ri India. Ka jingpynbor ban rwai ïa ka Vande Mataram ka long kum ka jingthombor bad thom jubor ïa ka riti ka dustur bad ka jingngeit u Khasi.
Ka KSU ka pynkynmaw ba ha ki snem kiba la dep, la don ka hukum ba baroh ki khynnah kynthei ha ki skul kin hap phong da ki jaiñ riam tynrai ki nong ri thor ha ki prokram Independence Day. Ka KSU ka la khanglad ïa kane bad buh jingkylli hato tang ki riam tynrai ri thor seh kiba dei shisha ki riam tynrai ha India, hato ka jaiñsem, ka dhara ki dei ki jaiñ nongwei?.
Kumta u Samla Donald u ong ba ka KSU ka kyntu ïa ka Sorkar Meghalaya, ki ophis Sorkar Pdeng ba don ha Jylla bad ki skul ba kim dei ban pyndem hakhmat ka jingthmu ba sha lyndet ka Sorkar India da kaba rwai ïa ka jingrwai Vande Mataram. “Ki Jylla ha ki thaiñ Shatei Lam Mihngi lem bad ki paidbah ki la pyrshah lut ïa kane ka hukum bad kum ki Khasi kiba don la ka jong ka snap kaba kyrpang bad ka riti ka dustur kaba skhem ngim dei da lei-lei ruh ban pdiang ïa kane ka jingleh donbor da ka Sorkar NDA.”
