Shillong, Lber 10
Ka lympung ïalehkai 2nd State Junior Inter-District Basketball Championship 2026 ba la pynlong da ka East Khasi Hills District Basketball Association ha ryngkat ka jingïatreilang bad ka Meghalaya Basketball Associa-tion, ka la sdang ha ka sngi Ba-ar ha madan Raid Laban College.
Ïa kane ka lympung la wan ban plie da u Myntri ba dei khmih ïa ka tnat Arts and Culture, u Bah Sanbor Shullai kum u kongsan ha ryngkat ka jingïadon lang ka President ka MBA ka Dr. Ampareen Lyngdoh kum ka symbud kongsan.
Haba kren ha kane ka sngi na ka liang u Bah Sanbor u la kitbok kitrwiang ïa ki rang bad ki thei ïalehkai na ki disctrict bapher bapher kiba la wan ban ïashim bynta ha kane ka lympung.
U la bynrap ruh da kaba ong ba ha ki por ba la dep ma u bad ka Kong Ampareen ki dei ki nongïalehkai, bad u la mihkhmat ïa ka kynhun ïalehkai phutbol jong ka Laban Sports Club.
Te kumta u la kyntu ïa ki samla pule ban trei shitom, namar ka pule puthi kam dei tang ka jingpynkhreh na ka bynta ka lawei, hynrei ka jingim jong ki. “Kum ki samla ki dei ban nang ban bate ïa ka kam ïalehkai bad ka jingpule.”
Haba ïa dei bad ka kamram ki nonghikai, u Bah Sanbor u la ong ba ki nonghikai ki dei ki mombati, kiba tbeh jingshai.
Na ka liang ka Dr. Ampareen ka la ong ba ka Jylla mynta ka dangpynkhreh na ka bynta ka National Games bad ka donkam bha ban pynkhreh ïa ki samla ka Jylla.
Ka la ong ba kane ka jingïalehkai kam don jingïapher ha ka rta namar baroh ki sngewtynnad ban ïalehkai. Ka la ai khublei ruh ïa ki Coach, ki dkhot jong ki artylli ki kynhun kata ka MBA bad ïa ka District Basketball Association kiba la trei shitom ban wanrah ïa ki nongïa-lehkai ba dangkhynnah sha kane ka lympung.
Haba phai sha ki jingïalehkai jong kane ka sngi sdang, ka East Khasi Hills (A) jong ki shynrang ka la pynliem noh ïa ka East Khasi Hills (B) da 66-39 poiñ bad hadien ka East Khasi Hills (A) ka la jop bing da 63-34 poiñ sa ïa ka Ri Bhoi District.
Ha ki jingïalehkai jong ki kynthei, ka Eastern West ka la pynliem noh ïa ka Ri Bhoi District da 15-6 poiñ bad ka East Khasi Hills (A) ka la jop da 43-14 poiñ ïa ka East Khasi Hills (B).
