Shillong, Lber 10
Ki bor distrik ka West Garo Hills ha ka Sngi Ba-ar ki la pynjlan biang ïa ka korphiw ha baroh kawei ka distrik sha ka 48 kynta, da kaba pynlong ïa ki nongshong shnong ban shong ha la ki ïing ki sem naduh ka por 12 baje mynstep jong ka 11 tarik u Lber haduh ka 12 baje mynstep jong ka 13 tarik u Lber katba ka jingïakynad kaba don jingïadei bad ka jingthep kyrteng na bynta ka ilekshon GHADC ka dang bteng.
Haba pynmih ïa ka hukum katkum ka Section 163 jong ka Bharatiya Nagarik Suraksha Sanhita, u District Magistrate, u Vibhor Aggarwal u la ong, “…(Nga) pynjlan shuh-shuh ïa ka korphiw ba la pynjari hapoh u pud u sam jong ka West Garo Hills baroh kawei na ka bynta ka por kaba 48 kynta. Kumta, ka korphiw kan treikam naduh ka 12 baje mynstep jong ka 11 tarik Lber haduh ka 12 baje mynstep jong ka 13 tarik u Lber, lait noh lada weng noh hashuwa.”
“Ha ka por ba pynjari ïa ka korphiw, ym dei ban don mano-mano ruh ba mih shabar jong ki jaka sah hapoh u pud u sam jong ka West Garo Hills,” u la ong.
U la ong ba ki jingjia jong ka jingkulmar bad ki jingpynthut ki buh ka jingma kaba khraw ïa ka jingim briew, ka jingshngaiñ jong ki paidbah bad ki jingdon-jingem.
“Ka jingbteng ïa ki lad jingïada kiba pyrkhing ka long kaba donkam ban wanrah biang ïa ka jinglong-jingman kumba ju long bad ban khang lad ïa ka jingnang jur shuh-shuh jong ka jingkulmar,” ong u Aggarwal ha ka hukum.
Ka hukum ka la bthah ruh ba ki shlem pule, ki ‘bank’, ki dukan, ki ïew bad ki ophis kin dang khang, lait noh tang ki jingshakri kiba kongsan-ki ‘hospital’, ki dukan die dawai, ki nongïarap ba kyrkieh bad ki jingshakri sha ki paidbah.
La bthah ruh ïa baroh ki bor jong ka aiñ, ki Executive Magistrate bad ki ophisar pulit kiba don hapoh ka distrik ban pyntreikam tyngeh ïa kane ka hukum bad ban leh ïa kaba donkam ïa kino-kino ki briew kiba lap ba ki pynkheiñ ïa ka korphiw.
“Kano-kano ka jingpynkheiñ ka don jingma ban shah pynshitom katkum ka kyndon 223 jong ka Bharatiya Nyaya Sanhita,” la maham shuh-shuh ka hukum.
Kane ka jingpynjlan ka long hadien ka jingsiat jong ki pulit kaba la ïalam sha ka jingïap jong arngut ki nongshong shnong ka Chibinang, ka jingshah thang ka Chibinang Bazar, bad ka jingkyrpad jong u DM ïa ki shipai na ka bynta ki ‘Flag March’ ha ki jaka thor jong ka distrik.
Kumba ka long mynta, ki jingshakri ‘Mobile Data Service’ ki dang shah khang na bynta 48 kynta ha kylleng ka distrik hapdeng ka jingpynjari aiñ ban tehlakam ïa ka shongsuk shong shngaiñ.
