New York, Lber:
Katkum ki khubor, la iathuh ba ki bor pyniaid ka New York, ki la ioh kem ia 2 ngut kiba don kti ha ka kam thombor ban kawang bom ha ka jingïakhih pyrshah Islam shabar ka ïingsah jong u nongmihkhmat ka New York, ha kaba, kitei ki 2 ngut ki la phla hakhmat ki bor ka aiñ ba ki ïoh mynsiem ban leh ia katei ka kam thombor na ka kynhun lehnoh Islamic State (IS) bad la pynngat ïa ki hapoh ki kyndon pynkheiñ aiñ ha ka sngi Nyngkong haba iadei bad kitei ki kam thombor jongki.
U Emir Balat, 18 snem ka rta bad u Ibrahim Kayumi, 19 snem ka rta, ki shah kynnoh, ba ki leit na Pennsylvania, ryngkat bad ki tiar pynbthei ba shyrkhei, sha Manhattan, ha ka sngi saitjain, ha kaba ka kynhun barit jong ki riew iakhih ba sha ka liang kadiang, ki la thmu ban pynlong ia ka jingialang pyrshah Muslim, shabar jong ka Gracie Mansion, pyrshah ia ki Muslim, New York City nyngkong, pyrshah ia u Zohran May’m.
Katkum ki dur bad video ba la saphriang ha ki rynsan ‘Social Media’, la iohi ia u Balat katba u dang thang ia utei u bom IED bad u la kawang ia u sha ka jaka ba don ki paidbah nongiakhih pyrshah jaitbynriew Muslim shwa ban thang ia u bom uba ar, ba la aiti ha u da u Kayumi bad pynhap ia u, la ong katei ka ejahar ba la ujor pyrshah ia ki. Ki pulit ki la lah ban bat ia ki tiar dih duma, ki jar ba la pyndait da ki duct tape kiba don ki skru bad ki bolt bad ka jingbthei TATP, bad ym shym la don mano mano ba mynsaw.
Hadien ba ki pulit ki la ioh bat noh ïa ki, kitei ki arngut ki la phla hi da lade ba ki la ïoh mynsiem ban leh ia katei ka kam na ka kynhun lehnoh Islamic State bad u Balat u la ïathuh ha ki pulit ba u kwah ban wanrah ïa ki jingthombor kiba kham jur shuh shuh ban ïa ka jingbthei bom ha Boston Marathon, kaba la jia ha u snem 2013 kaba la pynïap ïa 3 ngut ki briew, katkum ka jingujor ba la mudui ha U.S. district court ha Manhattan ha ka Sngi Nyngkong.
Ki pulit ki la iathuh ba kane ka long ka sien ba nyngkong ban sakhi ia ka jingbthei u bom (IED) hapoh ka nongbah New York ha une u snem 2026.
