Shillong, Lber 10
Ka Board of Control for Cricket in India (BCCI) ha ka sngi Ba-ar ka la pynbna ban pynkup burom da ka khusnam pisa kaba T.131 klur ïa ka kynhun ïalehkai ka India halor ka jingjop ha ka ICC Men’s T20 World Cup 2026 kaba la poi sha kaba kut ha ka sngi U Blei.
Ka India kum ka nongpynlong, ha ka jingïalam u Suryakumar Yadav, ka la rah ïa ka trophy hadien ba ka la jop da 96 ron ïa ka New Zealand ha ka jingïakhun final ha Narendra Modi Stadium ha Ahmeda -bad ha ka sngi U Blei, na ka bynta ban bat biang ïa ka nam lahduh bad ban long ka kynhun kaba nyngkong ban bat ïa katei ka nam ha la ïing ha ka T20 World Cup. Da kane ka jingjop, ka India ka la long ruh ka kynhun kaba nyngkong eh ban jop lai sien ïa kane ka lympung.
Ha kane ka kyrwoh jingpynbna, ka BCCI ka la ai khublei ïa ki nongïalehkai, ki nongkyrshan, bad ki nongjied na ka bynta kane ka jingjop bad kitbok kitrwiang ïa ki ba kin dangïai bteng ban khur jingjop.
U President ka BCCI u Mithun Manhas u la ïaroh ïa ka jingjop kum ka khyllipmat jong ka jingsarong kaba khraw na ka bynta ka India. “Ban ïada ïa ka nam lahduh bad ban ïoh ïa kane ka jingjop ha la ïing ka long kaba kham kyrpang.” U la ai ka jingïaroh ïa u kapten u Suryakumar Yadav, u coach ba hakhmat eh u Gautam Gambhir, ïa ka kynhun, bad ki nongjied ïa ka kynhun ïalehkai ha baroh kawei ka lympung ïalehkai.
U secretary ka BCCI, u Devajit Saikia u la pynpaw ba ka jingjop ka India ha ka kriket ka la kyntiew ïa ka nam, da kaba kdew ïa ka jingjop jong ka kynhun ha la ïing ha baroh ar tylli ki lympung ïalehkai jong ka ICC Women’s World Cup ha u snem ba la dep bad ka T20 World Cup.
U la ai khublei ïa u secretary barim ka BCCI u Jay Shah uba la pynkhlaiñ ïa ki rukom treikam jong ka kriket India bad ka kyrdan jong ka pyrthei.
