Shillong Lber 10
U nongïalam ka Liang Pyrshah uba dei ruh u Myntri Rangbah barim ka Jylla, u Dr. Mukul Sangma mynta ka sngi Ba-ar u la ujor da ka ejahar sha u Officer-in-Charge jong ka thanat Phulbari pyrshah ïa u MDC barim ka GHADC u Esmatur Mominin, uba la ong ba u la ai jingkren khlem da tip ne da thmu, hynrei ka jingkren jong u ka long ban pynkhihwin ïa ki katto katne ki kynhun bad ban wanrah ïa ka jingbym ïasngewthuh jingmut hapdeng ki katto katne ki jaidbynriew.
U Dr. Mukul u la ong ruh ba ha ka bynta kaba khatduh jong ka durkhih u la kdew ïa ka kyrteng jong u bad arngut ki riew pawkhmat kum kiba la ai jingmynjur ïa u ban thep kyrteng (Nomination), kaba pyni ruh ba ki ai jingbit ïa ki non-tribal ban shim bynta ha ka ilekshon District Council.
Hynrei u la pynshai ba kane kam dei ka jingshisha, namar ym shym la don kano-kano ka jingïakren lane ka jingmynjur na u ne na kino-kino kiba mihkhmat ïa u.
Ha ka ejahar, u la ong ba ha ka jinglong jingman jong ka imlang sahlang bad namarba u bat ïa ka kam paidbah, kane ka kam ka lah ban dei ka jingpyn saphriang khubor bym shisha kaba lah ban wanrah jingïapher, pynmih jingisih hapdeng ki jaitbynriew bad ruh ban pynlong ïa kawei ka kynhun ban leh pyrshah ïa kawei pat.
Kumta u Dr. Mukul Sangma u la kyntu ïa ki pulit ba kin leh eiei katkum ka kyndon 192,196, 353 bad 57 jong ka Bharatiya Nyaya Sanhita lane kino-kino ki kyndon kiba sngewïahap.
Kum ban shu pynkynmaw ha ka durkhih ba la saphriang ha social media la pyni ba u Mominin u la ai jingkren ha ka jingïalang hadien ba u shah shoh ha phyllaw ka Ophis u Deputy Commissioner ka West Garo Hills kaba la jia ha 9 tarik mynta u bnai Lber katba u dang mut ban leit thep kyrteng.
