Nongpoh, Lber 10
U Superintendent of Police ka Ri-Bhoi District ha ka jingpyllait khubor mynta ka sngi, u la ïathuh ba ha ka janmiet jong ka Sngi U Blei ba lah dep, kata ha ka por kumba 6 baje eiei, uwei u rangbah uba don ha ka rta kaba 25-30 snem eiei, u la shah tynrah ha kawei ka kali ka bym lah satia ban tip ha ki bynta jong ka surok Shillong-Guwahati jong ka National Highway 6 ha Patarum, Umsning.
Utei u heh pulit ka Ri-Bhoi, u la ïathuh ruh ba utei u rangbah uba la shah tynrah, u dei uba la shoh khawiang bad katei ka kali kaba tynrah ïa u ruh, ka la phet noh bak na katei ka jaka tang mar ïa dep katei ka jingjia.
Ïa utei u rangbah uba la mynsaw jur ha katei ka jingjia, la pynkit nyngkong sha Umsning CHC bad hadien pat la kynriah noh sha Civil Hopsital Shillong na ka bynta ban ïoh ïa ka jingsumar kaba kham bha, hynrei namar ka jingjur jong ka jingmynsaw, utei u rangbah ula khlad noh hapdeng ka jingsumar.
La ïathuh ruh ba na ka liang ki bor pulit, ki la pynlong ïa ka jingtohkit bad pyrshang ban buddien ïa katei ka kali kaba donkti ban tynrah ïa utei u rangbah, hynrei kim shym la ïohi eiei bad watla na ka liang jong ki, ki la pyrshang ban ïoh jingtip ruh ïa ka kyrteng jong utei u rangbah, hynrei ki khlem lah satia ban ïoh.
Halor kane, na ka liang ki bor pulit ki la pyntip ba utei u rangbah u dei uba jrong kumba 5-5.4 phut eiei bad uba phong ïa ka jaket kaba rong jngum, ka sopti kaba rong bneng ryngkat ki laiñ lieh bad ka patlun rong ïong. Ki pulit ki la kyrpad ba lada don kino-kino kiba ithuh ne tip shaphang une u rangbah, ki lah ban phone sha ka Police Control Room (PCR) jong ka Nongpoh ha u nombar – 9856084214.
