Shillong, Lber 11
Ka Hynñiewtrep Integrated Territorial Organization (HITO) Shillong City hapoh ka jingïalam u Samla Pynshngaiñ Nongrum, Organizing Secretary, ha ka jingdon ryngkat ki nongkitkam ka Shillong city ha ka sngi Balang ki la leit ban beh krad ïa ki bar jylla kiba trei ha Mawlai Pata bym don ki kot ki sla kiba biang.
Ka jinglap ka HITO ba ki don ki bar jylla kiba trei ha katei ka jaka bym biang ki kot ki sla ka dei hadien ba la ïoh ïa ka jingujor na ki paidbah.
Kumta mar-mar ki dkhot ka HITO ki la hiar sha Mawlai Pata bad la lap ba ki don shisha ki bar jylla kiba trei khlem ki kot ki sla kiba biang ha Mawlai Pata bad ka seng ka la beh krad noh ïa ki.
Ka HITO ka la maham ruh ïa kine ki bar jylla ba kim bit ba kin trei khlem da biang shuwa ki kot ki sla bad ba ki dei ban pynbiang kum ki Labour license bad ki Police Verification.
U Samla Pynshngaiñ u la ong ba ka seng na ka por sha ka por ka ju shem bad lap ïa kum kine ki kam ba ki bar jylla ki trei khlem da biang ki kot ki sla. Kumta u la kyntu ïa ka tnad Labour ba shuwa ba kine ki bar jylla kin rung sha ka Jylla ki dei ban pynbiang lut nadong shadong ïa ki Labour License.
“Lada ka seng ka lap biang ïa kum kine ki briew ba nabar ba wan trei khlem kot khlem sla ngin shu beh beit naphang,” u la bynrap.
Shuh shuh u la bthah ruh ïa ki shnong ba kin sngewbha ban peit pyrman bha ïa ki briew kiba nabar ban wan trei namar kiba bun kim biang ïa ki kot ki sla bad “Ngi dei ban shimkhia namar lada ngim shimkhia hi na ka liang ka shnong kan shem jynjar bha.”
Halor kane ka jingïoh bat ka seng ïa kine ki briew, u Samla Pynshngaiñ u la dawa bad pynkynmaw ruh sha ka Sorkar ba kin ai noh ïa ka Inner Line permit (ILP) khnang ba kan long ka jingïada na ka jingrung kyrthep kine ki briew ba nabar.
