Shillong, Lber 11
Ki jaitbynriew Garo kiba sah ha kylleng jong ka Nongbah Shillong ba kynthup ïa ki dkhot ka Garo Students’ Union (GSU), ki samla kynthei bad shynrang ha ka sngi Balang ki la wan poi khrui ha Motphran ban ïa shimbynta lang ha ka jingïalang ba la pynlong da ka Confederation Of Meghalaya Social Organization (COMSO) ban pyrshah ïa ka jingpyni bor ki bym dei ki riewlum ha jaka them ha West Garo Hills District.
Haba wan poi ha kane ka jingïalang ki jaitbynriew Garo ki la pyrta da kaba ong ‘Im slem Achik’ ha ka jingwan da ki spah ngut bad ryngkat ki plakad ban pyrshah ïa ka jingïoh thep vote bad ïoh ïakhun ilekshon MDC ki bym dei ki jaitbynriew Garo KHADC.
La sakhi ruh ba ki bor pulit ki la pynlong bha ïa ka jingpahara ha man la ki lad khnang ba kan nym don kano-kano ka jinghuri hura.
Ka jingmih ka huri hura ha Garo Hills ka dei hadien ba ki sengbhalang ha ryngkat ki paidbah na ki thaiñ Garo ki la pyrshah ïa ka jingthep kyrteng u MLA barim ka Phulbari u Estamur Mominin ban long kum u kyrtong ha ka ilekshon MDC ha GHADC bad ban pyrshah ruh halor ka jingïoh thep vote ki briew bym dei ki jaitbynriew Garo.
Kumta na ka liang ka COMSO ka la shim ïa kane ka lad ban pynlong ïa ka jingïalang paidbah kum shibynta ban pyni ba ki jaitbynriew Khasi-Jaiñtia ki kyrshan radbah ïa ka jingpyrshah ki Garo ban nym shah ïa ki bym dei ki riewlum ha Garo ban ïoh thep vote ha ka ilekshon GHADC ka ban sa long shen.
Nalor ki nongïalam bad ki paidbah Garo kiba na Shillong, la wan ban synran lang ruh ha kane ka jingïalang da ka Hynñiewtrep Integrated Territorial Organization (HITO), Jaiñtia National Council (JNC), CORP, Khun Hynñiewtrep National Awakening Movement (KHNAM), Hynñiewtrep Youths Council (HYC) bad kiwei-kiwei de.
U Bah Roykupar Synrem, Chairman ka COMSO bad uba dei ruh u President ka HYC u la ther tyngeh da kaba ong ba kane ka jingjia ha Garo dei na ki nongïalam kiba mynshuwa kiba ai lad ïa kine ki briew kiba nabar ban rung sha kane ka Jylla bad mynta ki la sdang kam trai sa ïa ka khyndew ka shyiap kiba dei hok jong ki jaitbynriew Garo.
U la kynthah ruh ïa u Myntri Rangbah ka Jylla u Conrad K Sangma da kaba ong ba u don por sa 3 snem ban pynthikna ban ïada ïa ka hok bad ïa ka khyndew ka shyiap bad ïa ka kolshor jong ki jaidbynriew Achik.
“Conrad Sangma wat klet ba phi long Myntri Rangbah na ka jingjied ki Achik bad lada ki kwah ki lah ruh ban pynhiar kyrdan ha u snem 2028,” u la ong.
U la ong ruh ba ki Bangal ki dei ban leit phai noh sha Bangladesh namar ïa ka Rilum Garo la long trai da ki Achik. “Kan ïai long mynta kan ïai long lashai bad kan ïai long junom ka jaka jong ki Achik,” u la ong.
Halor ka jingkren u Sofior Rahman MDC barim ka GHADC uba kam ba ka Chibinang, Phulbari, Rajabala ki dei ki jaka ba long trai ki Bangal, u Bah Roykupar u la ong ba lada u nud u dei ban wan mih markhmat ym ban rieh.
Shuh shuh u la ong ba ki Achik kin sa lap ïa u bad lada u nud ban wan sha Shillong ruh ki Hynñiewtrep kin sa lap ïa u. “Kynmaw ba ki Achik bad ki Hynñiewtrep ki dei ki trai jong ka Meghalaya, ym ki Bangladeshi ne ki Pakistani. Khie leit pyrta Allah Hu Akbar Sha Bangladesh ngim don jingwit ei-ei ïa kata, wat wan pyrta Allah Hu Akbar ha Meghalaya pat” la bynrap u Bah Roykupar.
U Bah Roykupar u la kop ruh ban ong lada u Sofior Rahman u kwah ban ïakhun udei ban wan ha Tura da kaba buh ïa ka por bad ka sngi, “ngin ïa peit mano ba jop.”
U Bah Roykupar u la kynnoh ïa ki nongïalam ka Jylla ba dei na ki ba kum kine ki jingjia ki wan jia, bad dei na ka daw jong ki ba u Dilseng Sangma u hap ban duh noh ïa la ka jingim bad ka kmie, ka lok ki khun jong u ki la duh noh ïa u nongbsa nongpjah ha ka ïing ka sem.
“Ka snam ka don ha ki kti jong ki bad ki hap ban rai kumno ban sait ïa kata ka snam na ka kti jong ki” u la ong.
U la ther biang ïa u Conrad Sangma ba u la shu pyndonkam ïa ki Achik tang na ka bynta ban jop ïa ka ilekshon, ban ïoh synshar bad ban long nongïalam ha ka Sorkar bad dei namar jong u ba kine ki jingjia ki jia mynta.
La ïoh ruh ka jingkren na ki nongïalam jong ki Garo bad na kiwei-kiwei de ki nongïalam jong ki kynhun sengbhalang.
