Moscow, Lber:
U President ka Russia, u Vladimir Putin, ha ka Sngi Nyngkong u la ioh ban iakren phone bad u President ka US- u Donald Trump, ha kaba kine ki 2 ngut ki nongialam jong kitei ki 2 tylli ki la ioh ban iakren halor ka jinglong- jingman jong ka thma Ukraine bad ka thma Iran.
U nongai jingmut jong u Putin, u Yuri Ushakov u la iathuh ba u Putin bad u Trump, ki la ioh ban iakren phone la lumba 1 kynta tam, ha kane ka sien iakren phone kaba nyngkong eh naduh u Nohprah ba ka US ka la wanrah ia ki jingiakren pynbeit bad ka Russia.
“La buh ia ka mat jingiakren halor ka jinglong jingman kaba don sawdong ka jingiakynad bad ka Iran bad ka jingiakren kaba dang iaid bad ki nongmihkhmat jong ka America halor ka jingpynbeit ia ka jingkylli jong ka Ukraine”, la ong u Ushakov.
U Ushakov u la ong ba u Putin u la khot ïa ka “jingpynbeit kaba kloi ha ka saiñpyrthei bad ka jingïadei” halor ka thma jong ka US bad ka Israel pyrshah ïa ka Iran, kaba la long ka paralok ba kongsan jong ka Russia.
U nongïalam ka Russia u la ai ruh ïa u Trump “ka jingbatai halor ka jinglong jingman kaba mynta ha u lain ïakynduh ha kaba ki shipai Russia ki ïaid shakhmat da ka jingjop kaba khraw”, u la bynrap, da kaba kdew sha ka thma Ukraine.
U Putin “u la bishar bniah bha ïa ki jingpyrshang pynïasuk ba la leh” da u Trump ha ka jingïakynad ha Ukraine, ong u nongai jingmut. Ka jingïakren kaba bun jait ka la long hapdeng ki heh sorkar jong ka Russia bad US bad hapdeng ki heh sorkar jong ka Russia, US bad Ukraine, hynrei khlem shym la don kano kano ka jingjop ha ka jingpyrshang ban poi sha ka jingsangeh thma.
U Ushakov u la ong ba ka Washington ka la kwah ban “iakren ia ki jingkylli kiba kongsan bha kiba iadei bad ka jinglong jingman jong ka pyrthei mynta”.
U Trump bad u Putin, ki la pynlong ia ka jingialang ha Alaska, ha u Nailar jong u snem ba ladep.
