Shillong, Lber 11
U Bah Donbok Dkhar, President ka Hynñiewtrep Integrated Territorial Organization (HITO) u la ong ba ka jingpynsangeh noh shuwa ka Sorkar ïa ka ilekshon MDC ha Garo Hills Autonomous District Council (GHADC) ka dei ka jingjop ba nyngkong eh ïa ki paid Garo.
Haba kren ha ka jingïalang paidbah ha Motphran kaba la khot da ka COMSO, u Bah Donbok u la ong “kynmaw ba ngi dei ban ïeng ha la ka hok bad ka la dei ka por ban knieh noh ïa ka hok bad ym dei ban randien noh na ka hok.”
U Bah Donbok u la byrngem ruh ïa ki poiwir kiba wan sah be-aiñ ha ki thaiñ Garo da kaba ong “Kumba leh u Syiem Tirot Sing ïa ki British yn sa leh kumta ïa ki ruh”.
U la pynkynmaw ba ha u snem 1952 ka la don kum kane ka jingjia ba ki pynrung kyrteng ïa ki 3 ngut ki bym dei ki riewlum ha Khasi Hills Autonomous District Council bad ha Jaiñtia Hills Autonomous District Council.
“Ngi ïeng beit ha ka nongrim bad ka hok long trai ïa ka khyndew ka shyiap ba ki mynder kim dei satia ban wan kam trai ïa kane ka Jylla bad ïa ka hok long trai ki Garo,” la ong u Bah Donbok.
U la ong “Ngin ai ka jingkyrshan kaba pura halor kane ka jingïakhih ki jaitbynriew na Garo.”
U la pynpaw ba “Kum ki samla ka Meghalaya ka dei ka kamram jong ngi ban ïada ïa la ka ri bad ka jaidbynriew na kine ki briew poiei bad ban ïeng ban ïatyllilang bad ki Garo ban ïada ïa la ka ri na ka jingshah thombor.”
