Ki khun barobor ki bit beit ïa u kpa ba ai symbai. Khyndiat eh kiba khongdur ïa ka kmie. Ka longïing longsem jongno jongno ruh haba phi bishar sani bha ïa ka dur ka dar ka rynïeng rynïot bad ïa ka jinglong ruh ki khun hi ki bit janai jaton ïa u kpa bad ka kmie kha. Haba dang rit dang khynnah ym pat ithuh bha ïano ki bit ïa ka kmie ne ïa u kpa. Hynrei ynda la nangheh ka rta phin sa iohi shai ba ka dur ka dar ka pyni ba ki syriem dur beit ïa u kpa ba ai ïa u symbai, ym ïa ka kmie ba kha ba pun. Kane ka long ka maïan Blei kaba paw ha ngi ki briew. Ki khun shynrang ne kynthei baroh ki khongdur sha ka liang u kpa bad ka Meikha ha ka rynïeng ka rynïot. Kane ka dei ka tynrai ne kata ka tlong kaba u Blei nongthaw nongpynlong u la ai ha ngi ki briew. Te ban puson ïa kane ka jingïadei hapdeng ki khun bad u kpa ka paw shai ba u kpa u long shisha u budlum ka longbriew manbriew hapdeng ki khun bad ka kmie hapoh ïing hapoh sem bad ha la ka rympei.
C. B. Iawphniaw
