Shillong, Lber 11
Ki bor distrik ka South West Garo Hills ki la khang ïa ki nongtrei Sorkar ban buh (post) ne ïasam ïa ki mesiej, ki dur ne ki dur-khih kiba lah ban wanrah ïa ka jingsngew jaidbynriew katba ki jingïakynad halor ka ilekshon GHADC ka la nang pur sha ki distrik ba marjan.
Ka Deputy Commissioner, ka Anendya Raajsshre ka la pynmih ïa ka hukum ha ka Sngi Balang kaba bthah ïa baroh ki khlieh jong ki tnad treikam ban pyntikna ba ki nongtrei kin “pyndonkam ïa ka jingpyrkhing” ha ki ‘Social-Media Account’ shimet jong ki.
Ka hukum ka ong shuh-shuh ba ki nongtrei Sorkar ki dei ban kiar na kaba buh jingthoh ne kren eiei halor ki jingjia kiba ïadei bad ka shong suk shong shngaiñ kiba jia ha kiwei pat ki distrik ne ki Jylla ha ka rukom kaba lah ban ktah ïa ka jingsngew jong ki paidbah, ka jingmut-jingpyrkhat, lane kaba lah ban pynmih ïa kiei-kiei hapdeng ki bynta jong ka imlang-sahlang, kaba lah ban nang pynsniew pynban ïa ka jinglong-jingman kaba la don lypa.
Kane ka jingbthah ka treikam ha baroh ki ophis Sorkar ha South West Garo Hills, bad la bthah ïa ki khlieh jong ki ophis ban pyntikna ba ki nongtrei jong ki, ki bud pyrkhing ïa kane.
Ka hukum ka la maham ruh ba kano-kano ka jingpynkheiñ kan khring ïa ka jingshah pynngat kyndon katkum ka aiñ nalor ka jingshah pynshitom katkum ka Meghalaya Civil Services (Discipline & Appeal) Rules, 2019.
