Shillong, Lber 11
Ki dukan jong ki bar jylla kiba don ha shilynter ka surok na Motphran ter-ter shaduh Bimola ki la khang khyrdep noh khlem nud plie shuh ha ka step jong ka sngi Balang, ka 11 tarik u Lber, 2026.
Kane ka jingkhang khyrdep ki bar jylla ïa ki dukan ka dei namar ba na ka liang ka Confederarion Of Meghalaya Social Organization (COMSO) ka pynlong ïa ka jingïalang paidbah ha Motphran kum shibynta ban pynpaw ïa ka jingai jingkyrshan ïa ki jaitbynriew Garo kiba la shah hiarthma ha kiwei pat ki jaitbynriew ha kitei ki thaiñ.
Lah ban kdew ba ka jingkhang lut ki bar jylla ïa ki dukan ka dei namar ba lehse ki don ka jingtieng bad jingsmiej halor ka jingpynlong ka COMSO ïa kane ka jingïalang paidbah ha Motphran.
Haba u nongthoh khubor u la leit ban jngoh ïa ki dukan bar jylla, la sakhi ba wat shaduh Khyndailad ruh la ïohi ba ki bar jylla ki la khang khyrdep lut ïa ki dukan jong ki, hynrei la sakhi ba ki Pulit ki la syrtap ha man la ki jaka bad ki lad khnang ba kan nym don kano-kano ka jinghuri hura.
Lah ban kdew, ka jingïakynad hapdeng ki jaitbynriew Garo bad kiwei pat ki jaitbynriew bym dei ki riewlum ka dei kaba la sdang naduh ka 09 tarik u Lber 2026, hadien ka jingshah shoh u MLA barim ka Phulbari u bym dei u riewlum u Estamur Mominin katba u dang leit ban thep kyrteng ban ïakhun ïa ka ilekshon MDC ha GHADC kaba ki paid Garo ki pyrshah halor ka jingïoh thep vote ne thep kyrteng ki briew bym dei ki riewlum ha ka ilekshon MDC ha GHADC.
