Shillong, Lber 11
U Myntri Rangbah ka Jylla Meghalaya U Conrad K. Sangma, u la buh ka jingkyrpad sha ki nongshong shnong ba kin pynneh ïa ka shongsuk shongsaiñ bad kiar na ki kam thombor hapdeng ki kynrum kynram ba dang shen ha ka thaiñ Rilum Garo .
Ha ka durkhih , u Myntri Rangbah ka Jylla uba la kren da ka ktien Garo, u la pynpaw ba kham hashwa u la ïoh jingtip ba ki kynhun bapher-bapher bad katto katne ngut ki riew shimet ki leit sha ka ïingsah jong u da ka jingthmu ban thang ïa ka ïing jong u bad ban thombor ïa ki bahaïing jong u. Katkum ka jingong jong u, kane ka jingtip bad katkum ka jingbthah na ki bor pahara, la aijingmut ïa u ban kynriah noh sha kawei pat ka jaka na ka bynta ka jingshngain, hynrei u la pynpaw ba u la jied ban ym mih na ka jaka sah jong u bad u la kyntait ïa ka jingai jingmut ban mih noh, da kaba ong ba um tieng.
U Conrad u la ong ba ka jingim jong u ha kaba kut ka shong ha ki kti U Trai. U la pynskhem ruh ïa ka jinglong jong u kum u Achik (Garo) bad u la pynpaw ba ka snam bad ka pateng jong u kpa jong u, uba la khlad noh u P. A. Sangma, ka dang ïaibteng ban ai mynsiem ïa u da ka jingshlur bad jingkut jingmut. U la bynrap ruh ba u ieid shibun ïa la ka imlang sahlang bad u shimkhia ban trei na ka bynta ka jingbha jingmiat bad ka jingkiew jong ki paidbah da ka jinglong bajanai bad ba hok tam.
Haba pynpaw ïa ka jingsngewkhia halor ka jingïakynad kaba dang ïaid shakhmat, u Myntri Rangbah ka Jylla u la kdew ba la don ki jingjia kynthup ïa ka jingpynjot ïa ki mar ki mata jong ka Sorkar bad ki jaka mane blei. U la pynpaw ruh ïa ki khubor ba la pynthut ïa ki ïing ki sem jong ki briew bad la pynthut ïa ki longïing. Kum kine ki jingleh, u la ong, kim pyni ïa ka jinglong bad ki nongrim jong ka shnong ka thaw bad ka imlang sahlang.
Da kaba pynksan ïa ka jingdonkam ban don ka jingshongshngain bad ka jingpynïaid, u Myntri Rangbah u la kyntu ïa ki nongshong shnong ban kiar na ki kam thombor bad pynjot. U la ban jur ba ïa ka jinglong jingman kaba mynta lah ban pynbeit tang lyngba ka jingïakren bad ka jingïatreilang kaba tei.
Haba khot ïa ki paidbah ban burom ïa ki rukom synshar paidbah bad ki tnad treikam, u la kyntu ïa baroh ban buh ïa ka jingmyntoi jong ka imlang sahlang bad ka Jylla halor kiei-kiei baroh bad ban ïatreilang ban pynïoh biang ïa ka jingsuk jingsaiñ.
“Kane ka dei ka jingkyrpad kaba jur jong nga ïa baroh,” ong u Myntri Rangbah ka Jylla haba pynkut ïa ka khubor jong u.
