Shillong, Lber 11
Ki jaitbynriew Garo kiba la wan lang ha ka jingïalang ha Motphran ba la pynlong da ka Confederation Of Meghalaya Social Organization (COMSO) ki la ong ba da lei lei ruh kin nym shah ba ki bym dei ki riewlum kin ïoh ban thep vote ne thep kyrteng ban ïakhun ilekshon MDC ha GHADC.
Kane ka jingpynlong ka COMSO ïa kane ka jingïalang ka dei halor ban ai ka jingkyrshan ïa ki jaitbynriew Garo kiba ïakhun ban nym ai lad ïa kiwei ki jaitbynriew ban ïoh thep vote ha GHADC bad kiba la shah thombor ha kiwei pat ki jaidbynriew mynta. Haba kren sha ki lad pathai khubor ki longkmie bad ki rangbah na ka jaitbynriew Garo ki la ong “ka dei ka hok jong ngi ban thep vote ha GHADC ym jong kiwei pat ki jaitbynriew bym dei ki riewlum. Kumta ngin nym ai lad ba kin wan ban thep vote ha ka khyndew bad ka shyiap jong ngi.”
“Ngi ïohi mynta kaei kaba jia hapoh Garo, ka dei ka hok jong ngi ban thep vote bad ka dei ka jaka jong ngi hynrei ïoh lad pat kiwei ki jaitbynriew, ngi hap ban pyrshah bad ngin nym ailad ïa ki,” la bynrap ki jaitbynriew Garo.
Kumta ki la ong ruh ba kum ki Garo ba sah ha Shillong ki wan sha kane ka jingïalang ka dei ban ai ka jingkyrshan ïa ka jingpyrshah bad ban pynrem jur ruh ïa kine ki jaitbynriew bym dei ki riewlum kiba wan kam trai ïa ka Khyndew ka shyiap ha Garo.
“Hapoh Meghalaya dei hok ki Khasi-Jaiñtia bad Garo kiba long trai ïa ka Khyndew ka shyiap te balei pat ngin ai lad ïa kine ki briew ki bym dei ki riewlum,” ki la ong.
