Shillong, Lber 11
U MLA ka Mawryngkneng Konstitwensi, u Bah Heaving Stone Kharpran, ha ka 11 tarik u Lber 2026, u la pyllait thymmai ïa 3 tylli ki projek na ka bynta ka jingbit jingbiang jong ki nongshong shnong ka shnong Diengpasoh.
Kine ki lai tylli ki projek ba u MLA u la plie thymmai, ki kynthup ïa ka Community Hall, ka kamra nonghikai ba thymmai ka Diengpasoh Presbyterian Secondary School bad ka kamra klas jong ka Diengpasoh U.P School.
Ïa ka program ha kane ka sngi la pynïaid da u Bah Louis Mukhim uba dei u Sordar Shnong, ryngkat ka jingdon lang u Bah Seibor Sana, u tymmen ba rangbah ka shnong Diengpasoh, Bah Silverious Kharumnuid uba dei u President ka Managing Committee ka Diengpasoh U.P School, Tbn.Spainder Marbaniang, Tbn.Kyrmenlang Kharsati, ki khynnah skul, ki nonghikai bad ki nongkitkam shnong.
Na ka liang u tymmen ba rangbah ka shnong, haba ai jingkren, u la pynpaw ïa ka jingsngewsih ba naduh ba ïoh ïa ka Jylla lade, ym pat ju don ba tyrwa ïing shnong ha Diengpasoh, bad watla bun ki MLA ki la leit la wan, hynrei ym don u wei u ban ai ïing shnong.
U la pynpaw ïa ka jingsngewnguh ïa u MLA ba mynta ba wat tang da ka jingïakren da ka ktien, u la lah ban wanrah ïa ka ïing shnong ba thymmai kaba la long ka jingmyntoi kaba kyrpang tam khamtam ïa ki nongshong shnong.
U MLA haba ai jingkren u la ong ba watla ka skhim ka long kaba rit ban ïa pynryngkat bad ka jingheh ka Konstitwensi, hynrei kum u MLA u hap ban kit lang ïa baroh kawei ka shnong ka thaw.
“Ngam don spah don phew ban ai sha ki paidbah, hynrei tang ka jingshakri kaba nga lah ban ai na ka bynta ki paidbah ka Konstitwensi jong nga” u la ong.
Shuh shuh u la ong ba lyngba ki kam kiba rit, ka Konstitwensi kan sa kiew bad watla ka por ka long kaba lyngkot, un leh katba lah ha ka bor ban pyndep ïa ka kamram kum u MLA.
Haba ïadei bad ki memorandum ba la aiti da ki artylli ki skul ka thaiñ, u MLA u la ong ba ïa ki jingdonkam kum ka paiñkhana un ïakren bad ka Swacch Bharat ryngkat bad ka block bad ïa kiwei ki jingdonkam yn wanrah biang da ki skhim kiba kyrpang.
Ka Community Hall kaba la plie thymmai ha kane ka sngi ka la kot sha ka 15,05,000 tyngka kaba la wan lyngba ka SWRP Scheme 2025-26 kaba kot sha ka 7,00,000 bad na ka Chief Minister Special Development Scheme kaba kot sha ka 8,05,000 tyngka. Ka kamra nonghikai ba thymmai jong ka Diengpasoh Presbyterian Secondary School ka la ïoh lyngba ka SRWP Scheme 2025-26 ha ka jinglut kaba 4,00,000 tyngka bad ka kamra class ba thymmai jong ka Diengpasoh U.P School ka la ïoh ha ka jinglut kaba 4,00,000 tyngka lyngba ka SRWP Scheme 2025-26.
