Shillong, Lber 11
U Myntri Rangbah ka Jylla Conrad K Sangma mynta ka sngi Ba-ar u la pynbna ba ïa ka ilekshon MDC sha Garo Hills Autonomous District Council (GHADC) yn pynsangeh shwa shipor, da kaba kam “Ïa ka jingsngew jong ki paidbah” hapdeng ka jingïakynad kaba la pynlong ïa arngut ki briew ban ïap bad pynmih ïa ka pakhang shnong ha West Garo Hills.
“Da kaba buh ïa ka jinglong jingman kaba long mynta ha Rilum Garo bad da kaba buh ha ka jingmut ïa ka jingsngew jong ki paidbah, ka Sorkar Meghalaya ka la rai ban pynsangeh noh ïa ka ilekshon GHADC,” ong u Conrad.
“Ngin sa shong biang ban shim rai kumno ban rah shuh-shuh ïa kane ka rukom treikam shakhmat.”
Ïa kane ka rai la shim shisngi hadien ba ka Meghalaya High Court ka la weng noh ïa ka jingpynbna jong ka GHADC ban shah ban thep kyrteng tang kiba don syrnod Schedule Tribe, ki sengbhalang ki la mih shakhmat ban khanglad ban thep kyrteng ïa ki bym dei ki riewlum, bad u nongmihkhmat barim jong ka West Garo Hills u la shah shoh ha ki riew paidbah.
Ka jingpynbna ba la pynmih da u Principal Secretary in-charge Home (Political) Bah F R Kharkongor ka la ong, “Ka jingpynbna…ka 9 tarik Risaw, 2026 kaba la pynmih na ka bynta ka West Garo Hills, bad kaba la pynmih ha ka 10 tarik Risaw, 2026 ka long na ka bynta ka East Garo Hills, North Garo Hills bad South West Garo Hills.”
Ka jingpynbna ba la pynmih da u Commissioner & Secretary in-charge District Council Affairs (DCA) u Bah Cyril Diengdoh ka la ong, “U Lat ka Jylla u sngewdei ban pynsangeh noh ïa ka ilekshon paidbah sha ka GHADC, tad haduh ban da mih kiwei pat ki hukum.”
