Shillong, Lber 11
Ki pulit ka Nuh District ki la pynngat kyndon ïa ki 12 ngut ki briew ki la shah mudui halor ka jingthmu pynïap briew hadien ba la kynnoh ba ki paidbhur ki la thombor ïa ka kynhun ki pulit ka Meghalaya bad ki la pyrshang ban pyllait ïa uwei u runar uba donkti ban tuh pisa na ATM kaba don ha Mylliem.
Katkum ka jingïathuh ki pulit ka Nuh district, kane ka jingjia ka la jia ha ka thaiñ Pinangwa Police Station hajan ka shnong Sikrawa ka ba hap ha Jylla Haryana ha ka por ba ka kynhun ki pulit ka Meghalaya ki dang ïalam ïa u Rahul Khan uba shong ba sah ha ka shnong Wajidpur, ban phah sha Meghalaya ha ka ‘transit remand’ ha kaba ïadei bad ka kam lute ATM.
U Additional Superintendent of Police (ASP) ka Nuh u Ayush Yadav u la ïathuh ba katei ka jingjia ka la jia ha ka janmiet jong ka sngi Ba-ar hajan ka HR-93 Donga Hotel. U la ong ba u nongshah kynnoh u la bat kynsan ïa ka steering jong ka kali pulit bad pyrshang ban pynphai ïa ka ha ka jingthmu ban lait na ka jingshah kem.
Kham hadien, ki paidbah kiba la don haduh 20-30 ngut, kynthup ïa ki kynthei, ki la ïalum lang ha katei ka jaka bad la kynnoh ba ki la ker sawdong ïa katei ka kali pulit. La ïathuh ba ki paidbah ki la pyrshang ban knieh ïa ki shabi kali bad ki tiar ïaleh na ki pulit bad pyrshang ban pynlaitim ïa utei u nongshah kynnoh.
Kumta ban ïada ïalade ki pulit Meghalaya ki la synreit kuli ban pyntieng ïa ki paidbah.
Ha katei ka jingsiat kuli, u Tarif Khan, uba dei u nongshong shnong jong ka shnong Sikrawa, ula mynsaw na ka bynta ka kjat jong u. Kumta la pynkit mar-mar ïa u sha PGIMS Rohtak, ha kaba ki doktor ki la ong ba ka jinglong jingman jong u mynta ka la biang.
Da kaba pynshong nongrim halor ka jingujor jong u Sub-Inspector u Arkidalang Wahlang jong ka East Khasi Hills Police Station na Meghalaya, ki pulit ka Pinangwa ki la pynngat ïa ka mukotduma hapoh ki kyndon bapher-bapher jong ka Bharatiya Nyaya Sanhita (BNS), kaba kynthup ïa ka jingthmu ban pynïap briew, pyrshah ïa ki 12 ngut ki nongshah kynnoh ba la pynpaw kyrteng bad kiwei pat ki briew ki bym pat lah ban ithuh.
Kiba la paw kyrteng ha ka ejahar ki kynthup ïa u Naseem, u Farooq, u Maimuna, u Saharuni, u Mustakeem, u Shahid, u Khuddi, u Khalid, u Bhupat, u Zafar, u Tarif Khan, bad u Rahul Khan.
Ki kynhun pulit kiba la poi sha katei ka jaka ki la lap artylli ki kuli cartridges, ka snam bad kawei ka patlun kaba la bit snam na katei ka jaka. Ka kynhun ‘forensic’ ka la jurip ruh ïa katei ka jaka bad lum ïa ki sakhi sabut.
Ki heh sorkar ki la ïathuh ba u Rahul Khan u dei uba la shah wad ha bun tylli ki kam tuh ATM, kynthup ïa kiba la register ha Dwarka bad Dabri Police Station ha Delhi bad da ka Special Cell ha Meghalaya. Ki pulit ki suba ruh ïa ka jingdonkti jong u ha ki kam ot ATM ha Assam bad Arunachal Pradesh.
Ki pulit jong ka Nuh district ki la ïathuh ruh ba la thaw ïa ki kynhun ba kyrpang ban kem ïa kiba donkti ban thombor ïa ka kynhun jong ki pulit ka Meghalaya, bad ka jingtohkit kaba kham bniah halor kane ka jingjia ka dang ïaid shakhmat.
