Shillong, Lber 12
U Bah Thomas Passah, Working President ka Khun Hynñiewtrep National Awakening Movement (KHNAM) u la ong ba ha ka por ba shah hiar thma bad pynlong mraw ïa ka jaitbynriew la mih u Tirot Sing bad u Kiang Nangbah ban ïaleh na ka bynta ka jaitbynriew.
“Naduh ki snem ba la leit ngi la pyrshang ban pynbor ïa ka Sorkar ban pynkylla noh ïa ka aiñ ban ïada ïa ka riti dustur jong ngi lyngba ki aiñ ki kanun kiba biang kum ka ILP,” la ong u Bah Thomas haba kren ha ka jingïalang kyrshan ïa ki riewlum Garo halor ka jinghiar thma kiwei pat ki jaitbynriew bym dei ki riewlum ha ka tei ka thaiñ.
Da kaba kynnoh ruh ba kine baroh ki jingjia ha Garo dei na ki nongïalam kiba mynshuwa ba kine ki briew na kiwei ki jaitbynriew ki sa ïoh ka lad ban rung be-aiñ hapoh ka Jylla.
Namarkata, u la ong ba ka la donkam ïa ka aiñ kaba khlaiñ halor ka jingrung kyrthep ki mynder sha kane ka Jylla.
“Ko Sorkar Sngewbha ban wanrah ïa ka jingïada kaba kyrpang sha kine baroh ki lai tylli ki Council na ka bynta ka hok bad ka dei ban wanrah kloi ïa ka ILP kaba lah ban ïada bad ban pynlip ïa ka ding”, la ong u Bah Thomas.
U la ong ba naduh ki snem ba la leit ki la ju ïai pynbor ïa ka Sorkar ban pynkylla noh ïa ki aiñ bad ban ïada ïa ka jinglong trai ïa ka riti ka dustur da u khulom uba nep lyngba ki aiñ ki kanun kiba biang. “Lada ngi kwah ban ïada ïa ka Khasi-Jaiñtia bad Garo na ka jingshah tuklar ha kiwei pat ki jaitbynriew ki bym dei ki riewlum, la hap ban pynkylla ïa ka AD Rule kaba 128 bad ka dei ka kam kaba suk na kiba suk tam ban leh,” u la bynrap.
“Ngi dei ban pynthikna ba hadien da san spah snem ruh ba ngi kiba long trai ngi dei ban long trai bad ym dei ban shah hiar thma ne shah knieh noh ha kiwei pat ki jaitbynriew,” u la bynrap biang.
