Nongstoiñ, Lber 12
Ka Federation of Khasi Jaiñtia and Garo People ( FKJGP), West Khasi Hills District ka la pynbna ban khot bad pynlong da ka Rally bad jingïalang paidbah ha Nongstoiñ ha ka 16 tarik mynta u bnai kum shi bynta ban pynbor ïa ka Sorkar ban pynbeit noh ïa u pud u sam.
U Bah Jistarland Lyngkhoi, Asistant General Secretary, ka FKJGP West Khasi Hills u la ong ba ka daw ba ka seng ka khot pynlong ïa kane ka jingïaid paidbah ka dei halor ka nongrim jong ka jingpynslem ka sorkar ban pynbeit noh ïa u pud u sam ha ka Jylla, kaba la shu sahteng mynta la palat 50 snem. Shuh shuh u la ong ruh ba ka seng kan sdang ïa kane ka jingïaid paidbah na ophis jong ka seng kaba don ha Upper New Nongstoiñ ter-ter sha ïew Nongstoiñ bad pynkut ïa ka jingïalang ha Market Complex, New Nongstoiñ. Namar kata, u la kyntu ïa ki paidbah, ki samla bad ki riew rangbah kiba don ka jingsngewkhia na ka bynta ka kam pynbeit pud, ba kin sngewbha ban wan sha katei ka jingïalang ha kaba ki nongïalam na ka FKJGP seng kmie na Shillong bad ki riew rangbah na thaiñ khappud kin wan ban ai jingkren ha katei ka sngi.
