Shillong, Lber 12
U Bah Pynshngain N Syiem, MLA bad MDC barim uba la mihkhmat arsien ïa ka Mawsynram Constituency bad shisien kum u MDC ka Maw-khar-Pynthorumkhrah Constituency u la mih noh na ka seng Congress ha ka 10 tarik Lber 2026.
Katkum ka shithi ba la phah sha u KC Venugopal u badei u General Secretary ka All India Congress Com-mittee (AICC) u la pyntip ba u la iehnoh kum u Working President ka Meghalaya Pradesh Congress Committee bad kum u dkhot ka Primary.
Ïa kane ka shithi iehnohkam la pyntip ruh sha u Bah Vincent H Pala uba dei u President ka MPCC, Saleng A Sangma MP na Tura, Deborah C Marak Wor-king President MPCC, Wansuk Syiem, General Secretary MPCC.
U Bah Pynshngain u la pynpaw ba u la ap la slem ïa ki nongïalam ka AICC ba kin jubab ïa ka jingpynsngew jong ki paidbah ha Meghalaya ban pynthymmai noh ïa ki nongïalam, ban pynkhlaiñ ïa ka Seng Congress hapoh Jylla haduh Primary unit hynrei ki Nongïalam na AICC ki bunkam ban kynthoh ïa ka Sorkar Pdeng ha jaka ban sngap ïa ki dkhot bad ki paidbah.
Kumta u la phah noh ka shithi iehnoh kam na ka shuki Working President jong ka Meghalaya Pradesh Congress Committee kaba treikam naduh mynta ka sngi.
Kum ban shu pynkynmaw u Bah Pynshngain N Syiem u la jop ïa ka ilekshon MLA na Mawsynram Constituency ha u 2008 na ka seng Congress haduh 2013 bad u la liem noh ha u 2018 hadien ba u la mih na ka seng Congress ban thaw ïa ka PDF hynrei hadien pat u la ïakhun ïa ka ilekshon shiteng samoi na Ranikor Constituency hadien ka jinghiar shuki u MM Danggo.
Ha ka ilekshon MDC ha u 2019 u Bah Pynshngain u la leit ïakhun na Mawkhar-Pynthorumkhrah Constituency na ka seng NPP bad ïoh jingjop.
Hadien katto katne snem u Bah Pynshngain u la leit phai biang sha ka seng Congress bad rem ïa ka ilekshon MDC na kajuh ka Constituency.
U Bah Pynshngain haba u la mih noh na ka Congress un sa rai bad ki nongkyrshan ban jied sa da kawei ka seng na bynta ban pynkhreh ïa ka ilekshon MLA ha u 2028.
Kumjuh ruh u Bah Pynshngain u la long ruh u Chief Executive Member ka KHADC ha ka por ba u dang long u MDC na Mawsynram Constituency na ka seng Congress bad Nongïalam Liang Pyrshah bad kum u Shongknor ka dorbar KHADC.
