Shillong, Lber 12
Ka Federation of Khasi Jaiñtia and Garo People (FKJGP) ka la kynnoh ba ka daw kaba la ïalam sha ka jingïakynad ha Ri-lum Garo ka dei namar ka jingthurmur jong ka Sorkar Meghalaya Democratic Alliance (MDA), bad dawa ban pynlong noh ïa ka jingïalang jong ka Kynhun Myntri ne ka Dorbar Kyrpang kaba mardor ban pynneh-pynsah ïa ki hok jong ka Khyrnit ba 6.
Ka kyrwoh na u President ka seng, Bah Dundee C. Khongsit ka la ong ba ka jingbitar ki paidbah ka la mih hadien ba ka Jylla kam shym la lah ban burom ïa ka rai jong ka Executive Committee ka GHADC ha u bnai Rymphang kaba khanglad ïa ki bym dei ki ‘riewlum ban ïakhun ne thep ‘vote’.
Ka seng ka la kam ba lada jyn ba ka Jylla ka la sngap ïa kata ka rai, ka jingkulmar kan ym shym la mih.
Ka seng ka la kyntu ruh ïa ka Sorkar “ban khot jingïalang ïa ki Myntri lane ban pynlong da ka Dorbar Kyrpang…ban wanrah biang ïa ka suk ka saiñ bad ban pynskhem ïa ki hok jong ki Garo kumba la ithuh hapoh ka Khyrnit ba 6.”
Ha kajuh ka por, ka seng ka la kynthoh ïa u Symbud Myntri Rangbah ka Jylla, Bah Prestone Tynsong, da kaba kynthoh ïa ka jingkren jong u ba ki kynhun seng ki “khanglad ïa ka roi ka par” hapdeng ka ‘Non-Cooperation Movement’.
Ka seng ka la buh jingkylli ruh la hato, na ka bynta u Bah Prestone, “ka jingpynroi ïa ki briew kiba nabar ka kham kongsan bun shah mo ban ïa ka jingïada ïa ki ‘riewlum”.
Na ka liang ka seng ka la ther tyngeh ruh ïa u Bah Prestone uba la kyntait ban pynïasoh ïa ka jingjia ha GHADC bad ki jingdawa Inner Line Permit (ILP).
Ka Meghalaya ka duna ïa ki lad jingïada ba khlaiñ kum ka ILP ban peitngor ïa ka jingwan buhai shnong, ong ka seng haba kylli la u Bah Prestone u la “klet mo ba ka jingkulmar ha Ri-lum Garo ka mih na ki briew kiba nabar kiba pynïaid ym tang ïa ki ïew ki hat hynrei mynta kiba la kyntur sa sha ka synshar-khadar.”
Ka FKJGP ka la kyntu ïa u Bah Prestone, uba bat ruh ïa ka tnad District Council Affairs, ban sangeh noh ka “jingtheh umphniang ha ka ding” da ki jingkren kiba kyntait ïa ki lad jingïada ïa ka Khyrnit ba 6.
Shuh shuh ka seng ka la dawa ba ka Jylla kan burom ïa ki hok jong ki trai-ri trai-muluk ban ïa kaba “buh hakhmat ïa ka roi ka par jong ki briew kiba nabar.”
Haba pynrem jur ïa ka Sorkar, ka FKJGP ka la ai mynsiem ïa ki nongshong shnong Garo “ban ym duh jingkyrmen, hynrei ban bteng ïa ka jingïakhun haduh ba ka Jylla kan pynurlong ïa ki jingdawa jong ki.”
Kane ka jingkyrpad ka long hadien ba u Myntri Rangbah ka Jylla, u Conrad K. Sangma u la pynbna ban pynkynriah noh ïa ka ilekshon GHADC bad kyrpad na bynta ka jingjai-jai hadien bun sngi jong ka jingbym shong suk shong shngaiñ.
