Jowai, Lber 12
Ka The Legends (Lissi Pearl) ka la pynliem noh ïa ka Evergreen Mukhla Mission da 175 run, katba ka Young Lads CC ka la jop da 95 run ïa ka Moodymmai SU ha ka lympung ïalehkai District Cricket League 2026 ba la pynïaid da ka West Jaiñtia Hills District Cricket Association, Jowai ha ka sngi Palei.
Ha kane ka jingïalehkai ka The Legends (Lissi Pearl) kaba la jied ban tied nyngkong, ka la kamai 222 run ha ki 35 over bad shah pynhap 8 wiket. U Shaniah Ryngkhlem u la tied 46 run na ki 55 bol (1 ‘six’ bad 5 tylli ki ‘four’), katba u Rae Sari u la ïoh 32 run na ki 32 bol. Katba ki nongkawang bok ka Evergreen Mukhla Mission, u Esalan Shylla u la khur 2 wiket ha ki 7 over.
Haba wan beh ïa ka thong, ka Evergreen Mukhla Mission ka la kamai tang 47 run hadien ba ka la shah pynkhyllem baroh ki nongtied ha ki 17.1 over. Kane ka la wan urlong lyngba u Starry Sana uba la khur 3 wiket lem bad ki 2 wiket na u Conrad Sana. Katba u Shoristar Suna u la tied 17 run na ki 20 bol bad khur ruh ïa nam Man of the Match.
Haba phai sha kawei pat ka jingïalehkai ka Young Lads CC ka la kamai 204 run bad shah pynkhyllem baroh ki nongtied ha ki 32.4 over. U Puraki Shadap Passah u la tied 38 run na ki 32 bol, u Namewanki Pakynteiñ u la ïoh 36 run na ki 41 bol bad u Chwamiki Ryngkhlem u la ïoh 30 run na ki 32 bol. Katba u Rijest Lytan u la khur 3 wiket na ki 7 over, katba u Teimiki Passah bad Richeal Passah – ki la khur mar 2 wiket.
Haba wan beh ïa ka thong ka Moodymmai SU ka la kamai tang 109 run hadien ba ka la shah pynkhyllem baroh ki nongtied ha ki 21 over. U Pyndap Lamin u la tied 16 run na ki 15 bol. Katba u Chwamiki Ryngkhlem u la khur 5 wiket na ki 5 over, katba u Namewanki Pakynteiñ bad Satemitre Bareh ki la khur mar 2 wiket. Ïa ka nam Man of the Match la khur da u Chwamiki Ryngkhlem.
