Tura, Lber 12
Hadien 3 sngi jong ka jingïakynad kaba jur kaba la pynkhihwin ïa kiba bun ki bynta jong ka Ri-lum Garo, khatduh-khatwai ka thaiñ ka la sakhi ïa ka sngi kaba khlem kano-kano ka jingkulmar la ka long ha kano-kano ka rukom kaba la ïoh jingtip.
Naduh ka Lah Sngi U Blei, hadien ba u MLA barim ka Phulbari, u S.G. Esmatur Mominin bad u Enamul Hoque ki la shah khang ban thep kyrteng bad kumba la kynnoh, ki la shah thombor, ka Ri-lum Garo baroh kawei ka la sakhi ïa ka jingïakynad kaba ym pat ju ïohi da ki phew snem ha ka Jylla Meghalaya.
Hadien ka jingwanphai jong u Mominin sha Phulbari, ka jingkulmar ka la sdang nyngkong eh ha Chibinang ha kaba ki ‘riew paidbah kiba rah ïa ki tiar ïaleh ki la sdang ban ïaid ha ka jaka ïew jong ka Chibinang. Ka ophis kaba nyngkong eh kaba la shah thang ka dei ka ophis jong ka GSU kaba don ha katei ka jaka bad katto-katne ki dukan kiba don hajan jong ka.
Kum ka jingpynphai kylla, kawei pat ka kynhun ka la hiar sha Chibinang bad sdang ban thang ïa ki dukan kiba hajan Lai-Lad jong ka Chibinang. Kumba la antad, ba palat 30 tylli ki dukan ki la shah thang bad 2 ngut ki briew ki la ïap ha ka jingïakynad kaba la jia ha ka 9 tarik u Lber.
Ka jingkulmar ha Chibinang ka la bteng baroh shi miet bad haduh ka step kaba bud ha kaba ki paidbah, ki la pra noh hadien ka jingsiat (blank firing) jong ki pulit ban tehlakam ïa u paidbhur.
Ka khubor jong ka Chibinang ka la poi sha kiwei pat ki bynta jong ka Ri-lum Garo bad pur shaduh ka sor Tura ha kaba ki paidbhur ki la thang ïa ki dukan bad ki shlem treikam ha ka 10 tarik u Lber.
La khot ïa 5 kynhun ki shipai bad kiwei-kiwei ki bor pahara ha ka 10 tarik u Lber ha ka jingpyrshang ban tehlakam ïa ka jinglong-jingman. Hynrei wat hapdeng ka jingdon jong ki bor pahara, ka 11 tarik u Lber ka dei ka sngi kaba shyrkhei tam na baroh lai sngi ha kaba la thang ïa ka ophis jong ka NPP ryngkat bad kiba bun tylli ki dukan, ki jaka set kali bad ki dukan pynlang mar.
Ka la don ruh ka jingpynjulor ïa ar tylli ki dukan die kyiad bad ka jingthang ïa ki kali.
Ki nongïakhih hadien kane, ki la ïaid sha ka ïingsah jong u Myntri Rangbah ka Jylla, u Conrad Sangma, kumba ka paw, da ka jingthmu ban thang ïa ka kumjuh. Hynrei ki bor pahara hadien kata ki la pyndonkam da ki tyndong lyer pynsat khmat, ka jingsiat ‘blank fire’ bad siat kuli kaba la ïalam sha ka jingmynsaw (kuli) ba malu-mala jong 4 ngut ki briew kiba la pynkit noh sha jaka sumar.
Ki tyllong khubor pulit ki la pyntikna ba hadien ka jingkulmar hynnin ka sngi, la don katto-katne ngut kiba la shah kem.
Mynta ka step, la sakhi ïa ki nongshong shnong kiba la mih sha surok ban pynkhuid ïa ki synrum hadien ka jingïakynad kaba la neh 3 sngi.
Ha kawei ka liang, ha ka jingpyrshang ban khanglad ïa ki kam pynkulmar, baroh arngut – u Myntri Rangbah kumjuh u Nongïalam ka Liang Pyrshah, Dr. Mukul Sangma ki la kyrpad ban tehlakam bad ban pynneh ïa ka suk ka saiñ.
Katba ha kaba sdang la pynjari ïa ka korphiw ha WGH na ka bynta 24 kynta, la pynjlan ruh sha kiwei pat ki jaka, ha kiwei pat ki distrik kumjuh. Ha kajuh ka por, ïa ka jingkhang ‘internet’, la pynjari nyngkong ha WGH hashuwa ban pynjlan sha baroh 5 tylli ki distrik bad kane kan ïai bteng haduh ban da mih da kiwei pat ki hukum.
Ha Williamnagar, kaba long sa kawei pat ka jaka pdeng, u paidbhur u la thang, lute bad pynpra ïa ki dukan bad ki shlem treikam ha ka miet jong ka 10 tarik u Lber hashuwa ban kiew biang sa shisien sha ka ïew bah ha ka step kaba bud ban bteng ïa ka jingpynkulmar. Ka jingtuklar jong ki pulit ka la pynsangeh ïa kine kiei-kiei baroh.
Mynta ka step, ka 12 tarik u Lber, khatduh la sakhi ïa ki jingpaw jong ka jingsuk kaba la wanphai biang da kaba pynjynsur ïa ka korphiw hapdeng ka por 8 baje mynstep haduh 1 baje mynsngi ban ailad ïa ki briew ban thied ïa ki marbam ba donkam.
“Ym shym la don kano-kano ka jingkulmar ne jingthang kaba la pyntip na kano-kano ka bynta jong ka WGH bad ka sngi ka la long kaba suk ba saiñ watla ka long kaba shong syier namar kaei kaba la jia. Ngi la kem katto-katne ngut ha ki kam pynkulmar bad ka jingtohkit halor kane ka kam ka dang ïaid mynta. Kyrmen ba ngi lah ban tem noh ïa ka jinglong-jingman,” ong u SP ka WGH, u Abraham T. Sangma.
Kumba ka long mynta, ki bor pahara, kynthup ïa ki shipai bad ki ‘Paramilitary Force’, ki dang don ha ka jaka jong ki, ban pyntikna ba kiei ki jingjia kiba la jia ha kine ki 72 kynta ba la dep, kan ym jia biang. Ka korphiw ka dang treikam ha ryngkat kijuh ki jingpynjynsur haduh ka 14 tarik u Lber, 6 baje mynstep.
