Gangtok, Lber 12
U Myntri Rangbah ka Jylla Sikkim u Prem Singh Tamang (Golay) u la ïakren bad ka kynhun ki nongthoh khubor na ka Jylla Meghalaya ha ka jingïakynduh ha ïingsah jong u ha Gangtok ha ka sngi Palei haba ïadei ka jingdonkam ka lynti rel.
Ha ka jingïakren, u Golay u la kren sani shaphang ki jingthmu ba ïadei bad ka roi ka par jong ka Sikkim, ki sienjam bapher-bapher ba ïadei ka jingsynshar bad ki sienjam ba la shim da ka Sorkar Jylla ban kyntiew ïa ka roi ka par kaba ïaineh, ka jingpynneh pynsah ïa ka mariang bad ka bha ka miat ha ka imlang sahlang.
U la sngap katba ki dkhot jong ka kynhun ki la batai shaphang ki kam ha ka jylla Meghalaya, kynthup ïa ka jinglong jingman jong ki lad pathai khubor, ka jingkiew ha ka imlang sahlang ka ïoh ka kot bad ka lad kaba don ha ka kam jngohkai pyrthei. U Golay u la ban jur ïa ki katto katne ki sienjam ba kongsan jong ka Sorkar Jylla, kynthup ïa ka Mero Rukh Mero Santati, ka sienjam ba thymmai jong ka Sorkar Sikkim kaba thmu ban pynkhlaiñ ïa ka jingïadei hapdeng ki kmie ki kpa, ki khun bad ka mariang. Hapoh kane ka prokram, la thung 108 tylli ki dieng na ka bynta uwei pa uwei u khunlung ba dang kha ha ka Jylla.
Ka sienjam ka pynïasoh ïa ka jingkha khunlung bad ka jingpynneh pynsah ïa ka mariang bad ka pynshlur ïa ki longïing ban sumar bad ïada ïa ki dieng katba u khynnah u nangheh nangsan. Ka jingmut ka pyni ïa ka jingmut ban rakhe ïa ka jingwan u khunlung katba ha kajuh ka por ka noh synñiang sha ka jingpynneh pynsah ïa ka mariang bad pynkhlaiñ ïa ka jingkut jingmut jong ka Jylla na ka bynta ka lawei kaba kham khuid.
U la kren ruh shaphang ka jingdonkam ban pynshlur ïa ka jingkha khun ha ka Jylla, da kaba ong ba ka Total Fertility Rate (TFR) ha Sikkim ka la sakhi ïa ka jinghiar. Ha kaba ïadei bad kane, ka Sorkar Jylla ka la wanrah ïa ki sienjam ai jingmyntoi bad ki lad jingkyrshan bapher-bapher kiba thmu ban pynshlur ïa ki longïing bad ban pynthikna ïa ka bha ka miat jong ki longkmie bad ki khunlung.
Ha ka jingïakren, u Golay u la pynkynmaw biang ïa ka polisi jong ka Sorkar Jylla ban ym ailad ïa ki kam dih drok, da kaba ban jur ba la shim ïa ki sienjam kiba tyngeh ban tehlakam ïa ka jingkhaïi drok bad ka jingdih drok, khamtam hapdeng ki samla. U la ban jur ba ki Jylla ha kylleng ka thaiñ Shatei Lam-Mihngi ki dei ban ïatreilang ban pynduh ïa ka jingma jong u drok na kane ka thaiñ.
U Golay u la kren ruh shaphang ka jingkiew ka jingwan ki nongjngohkai pyrthei sha Sikkim, da kaba ong ba ka kam jngohkai pyrthei ka la long kawei na ki rishot ba kongsan jong ka ïoh ka kot ha ka Jylla.
U la ong ba ka Sorkar ka dang ïai pyrshang ban pynthikna ba ki nongwan jngohkai kin ïoh ïa ka jingshem kaba shngaiñ, kaba suk bad kaba sah jingkynmaw katba ki dang leit jngohkai ïa ka jingitynnad jong ka mariang bad ka pateng ba ïadei bad ka kolshor jong ka Jylla.
Haba ban jur ïa ka jingdonkam ban kyntiew ïa ka jingpynïasoh, u Golay u la kren shaphang ka projek lynti rel Sivok-Rangpo kaba dang ïaid shakhmat, ka ban pynïasoh ïa ka Sikkim bad ka lynti rel jong ka ri ha ka sien kaba nyngkong. U la pynpaw ka jingkyrmen ba ïa kane ka projek yn pyndep shuwa u snem 2027, ka ban pynsuk shibun ïa ka leit ka wan ha ka Jylla. Ha ka jingïakren, u Golay u la ban jur ruh ïa ki sienjam ba ïadei bad ka bha ka miat ba la ai sha ki nongthoh khubor ha Sikkim, kynthup ïa ki skhim bai bam tymmen bad kiwei-kiwei ki jingmyntoi ha ka imlang sahlang bad u la kylli shaphang ki kyndon kiba kum kine kiba lah ban ïoh na ka bynta ki nongthoh khubor ha Meghalaya. U la ban jur ïa ka bynta kaba kongsan kaba ki nongthoh khubor ki don ha kaba pynkhlaiñ ïa ka synshar paidbah bad ban pynïasoh ïa ka Sorkar bad ki briew.
Ki dkhot jong ka kynhun ki nongthoh khubor kiba la leit jngoh ki la ïaroh ïa ka roi ka par bad ka rukom synshar jong ka Sikkim, da kaba ban jur ïa ka jingpynleit jingmut jong ka Jylla ha ka rep ka riang ka bym pyndonkam dawai, ka jingpynïaid ïa ki kali kaba paka, ka jingkhuid jingsuba, ka jingshngaiñ bad ka jingsynshar kaba bha. Ki la ïaroh ruh ïa ka jingkylluid mynsiem bad ka jingsbun ki briew jong ka Jylla Sikkim.
Kane ka kynhun ka kynthup ïa ki nongthoh khubor kiba mihkhmat ïa ki print, electronic bad digital media na ka Jylla Meghalaya bad ka dang leit jngoh ïa ki katto katne ki jaka treikam bad ki jaka ba kongsan ha kylleng ka Jylla Sikkim kum shi bynta jong ka ‘Exposure Tour’ ba la pynlong da ka Press Information Bureau Shillong ryngkat ka jingïatreilang bad ka Press Information Bureau Gangtok.
Ïa kane ka kynhun la ïalam da u Gopajit Das uba dei u Assistant Director ka Press Information Bureau Shillong, ha ryngkat u Manas Pratim Sarma uba dei u Assistant Director ka Press Information Bureau Gangtok uba la ïarap ïa kane ka prokram ha kane ka Jylla. Ka Annapurna Alley, IPR Secretary, u Yougan Tamang, Press Secretary sha u Myntri Rangbah, bad u Sunil Mothey, IPR Director ki la ïadonlang.
