UN, Lber:
Ka UN Security Council ha ka Sngi Balang ka la wanrah ia ka aiñ, ka ban khang pyrshah ia ka Iran ba ka dei ban sangeh noh shi syndon ia ka jingthombor sha ki bynta jong ka Gulf, ha kaba, la ong ba ka jingleh pyrshah ia kane ka jingmaham, ka long ka jingpynkheiñ ia ka aiñ ba la buh ia ki ri ka pyrthei bad ba ka long ruh ka jingma kaba khraw ia ka shongsuk- shongsaiñ ha ka pyrthei.
Katei ka rai ba la wanrah da ka UN, ka la ioh ia 13 tylli ki jingkyrshan bad 2 tylli ki jingpyrshah haba la pynsngap ia ka hapoh ka Council. Kane ka aiñ, ka hukum ia ka Iran ba ka dei ban sangeh noh shi syndon ia ka jingthombor sha ki bynta jong ka Gulf kiba kynthup ia ka Bahrain, Kuwait, Oman, Qatar, Saudi Arabia, United Arab Emirates bad ka Jordan.
Kane ka rai ka “pynrem ruh ia kino- kino ki kam ne jingbyrngem jong ka Ri Islam kiba thmu ban khanglad, ne da kumwei pat ban pynthut ia ka jingleit jingwan jong ki ri lyngba ka duriaw Hormuz.”
Ka Iran, ka la thombor sha ki bynta jong ka Gulf, kum ka jingpynshitom bein ia ki jing thombor jong ka US bad ka Israel, kaba la pyniap ia u nongialam ba ha khlieh duh jong ka Iran, u Ayatollah Ali Khamenei.
Ka ri Islamic ka la siat ruh ia ki lieng khaii kiba iaid lyngba ka Strait of Hormuz, ka lynti duriaw kaba kongsan bha na ka bynta ka khaii umphniang ha ka pyrthei, ha ka jingthmu ban pynjynjar ia ka ioh ka kot jong ka pyrthei.
