Shillong, Lber 12
U Saleng A Sangma MP na Tura Parliamentary Constituency ha ka sngi Palei u la ong ba ka jingjia ïakynad ha Rilum Garo ka dei namar ka jingbym shimkhia ban pyntreikam ïa ki aiñ ha ki phew snem kiba la dep da kaba u la ong ba ka pynkhihwin halor ka jingpynrung kyrteng ki bym dei riewlum ka mih na ka kyndon ba la don ha ki por ba kham mynshuwa.
Haba kren sha ki nongthoh khubor u Saleng u la ong ba un ym kynnoh ïano-ïano, namar ka dei ka kyndon ha kaba la thaw ha ki por ba la leit namar ki nongïalam ha kito ki por kim don ka jingïohi jngai, kaei ka ban jia ha ki por ban wan na ka jingbym shimkhia jong ki.
U Saleng u la ong ba ki jingïasyllok kin bud ban buh ïa ka lynti ban ïaid shakhmat, katba ka jingpynbor ka nangkiew ïa ka Garo Hills Autono-mous District Council ban shim ïa ki kyndon ba shai jong ka jingbit jingbiang hapoh ka Sixth Schedule.
Namar ba ngim kwah ba kum kine ki jait jingkulmar ba kin dang ïai jia ha ki por ban wan, ngin sa ïa kren ïa kane bad ki riewstad, riew shemphang kumjuh ki rangbah khnang ba kin lah ban ai jingmut kumno ba ngin pyrkhat ïa kaba sa wan ïa kane ka bynta.
Haba kylli ïa ka jingai jingmut u Lat halor katei ka mat baroh kawei, u Saleng u la ong, ba u Lat ka Jylla u long uba peit bniah bha ïa ki kyndon jong ka aiñ.
U la pynpaw ïa ka jingsngewsih, da kaba ong ba lada ki kyndon aiñ ki don ha ka jaka jong ki, la thikna ba kum kine kiei-kiei kin ym jia satia bad bynrap namar ba ki Autonomous District Council ki dei kiba synshar hi bad ba kim pdiang ïa kiwei.
U la pyntip ba u Lat ka Jylla u la pynthikna ïa ka jingdonkam ban wanrah ïa ki jingpynkylla kiba donkam ha ki kyndon jong ka AD rule. “U Lat u la ong ban peit kumno ban ïaid bad ki kyndon, ki rukom treikam bad kiei ki jait jingpynkylla kiba dei ban leh bad ban sa ïakren sha ki paidbah.”
U Saleng u la pynksan ïa ka jingïapher ha ka riti synshar hapdeng jong ka jingïakynad ha Garo Hills da kaba ong, “Ka Khyrnit ba hynriew ka dei na ka bynta ki riewlum bad baroh ki tip ïa ka, phim lah ban pynïahap ïa ki hok ba kongsan bad kata ka khyrnit ba hynriew namar ba ka la ïoh ïa ka jinglong kaba pher bad kaba don la ka jong ka jingsynshar hi.”
Shuh-shuh u Saleng u la pynpaw ïa ka jingsngewkhia halor ka jingrung jong ki Rohingya ym tang sha Meghalaya hynrei sha kiwei pat ki bynta khappud jong ka ri India. Haba ïadei bad kane u la pan ïa ka shuh-shuh ki bor pahara ban pynkhlaiñ ïa ka jingpeitngor ha ka thaiñ.
