Shillong, Lber 12
U MP ka Congress na Tura Parliamentary Constituency u Saleng A Sangma u la pynpaw ba ka jingmih ka jingïakynad ha Rilum Garo bad kaba la pynbor ban pynkynriah ïa ka ilekshon MDC ha Garo Hills Autonomous District Council (GHADC) ka lah ban dei ka buit saiñ hima sima bad u la ai jingïaroh ïa ki pulit ka Jylla Meghalaya ïa ka jinglah jong ki ban tem ïa ka jingïakynad ba kan nym neh slem.
U Saleng haba ïakren sha ki nongthoh khubor hadien ka jingïakynduh ïa u Lat ka Jylla u CH Vijayashankar u la ong ba ki tnad bapher-bapher ki la ïadon bynta ha ka ban tem ïa ka jingïakynad bad ai khublei ïa ka tnad pulit ka Jylla Meghalaya ba ki la lah ban pynjai-jai ïa ka jinglong jingman ha ka thaiñ.
Haba jubab ïa ki jingkylli, la u Saleng un dawa jingtohkit ne em halor kane ka jingjia kum u MP, u la ong ba un ym ong ba un pynbor ban don ka jingtohkit bad ong ba ai ba ki bor ka aiñ kin shim ïa la ka jong ka bynta. Hynrei u la buh jingkylli ïa ka jingmih ki jingkulmar ha kiwei pat ki thaiñ ba shongsuk haba pynpaw ba ka Rilum Garo bad Meghalaya ki dei kiba ju shongsuk bha.
U ong “Lehse ki don kiba kynshoit ïano-ïano” bad “phim lah ban tip la ka dei ka buit saiñ hima sima lane don mano re mano kiba kwah shim kabu ïa ka jinglong jingman.” u Saleng u la ong “To ngin ïa duwai ba kiei-kiei baroh kin biang noh” bad kular ban pynlong ïa ki jingïasyllok halor ka jingpynkylla ïa ka rule jong ka Sixth Schedule ha shuwa ban pynbna biang ïa ka tarik jong ka ilekshon GHADC.
