Shillong, Lber 12
Hadien ka jingmih ka huri hura ha Rilum Garo hadien ba ki la pyrshah ïa ki bym ki riewlum ban ïashim bynta ha ka ilekshon ha Garo Hills Autonomous District Council (GHADC), na ka liang u Bah Ardent Miller Basaïawmoit, President ka VPP u la mih shakhmat ban pynrem jur ïa ka jingbymler ka rukom treikam ka Sorkar MDA-II.
Haba kren sha ki lad pathai khubor u Bah Ardent Miller Basawïa-moit u la ong ba ka VPP kan don ryngkat bad ki Garo ha kane ka jingïaleh jong ki ban ïada ïa la ka jinglong trai ïa ka khyndew ka shyiap.
U la ong ruh ba ïa kane ka mat u la dep ban kren ha ka Dorbar Mang tyngka ha Ïingdorbar Thawaiñ kaba dang shu dep shen, hynrei ki nongïalam ka Sorkar MDA ki pynpaw ba kim lah ban khang ïa ki bym dei ki riewlum ban ïashim bynta ha ka ilekshon MDC ha GHADC.
Nalor kata, u la ong ruh ba ka khyrnit kaba hynriew ne ka Sixth Schedule kam dei ba ka Sorkar Pdeng ka ai sngewbha ïa ka Jylla hynrei ka dei ka jingtrei met bad mynsiem ki nongïalam ba la leit noh kiba la pynïoh ïa ka ban long kum ka jingïada ïa ki paid riewlum.
Kumta u ong ba ka jingkren jong kiba don ha ka Sorkar mynta ka pynpaw shai ba kim don ka jingkitkhlieh na ka bynta ki paid riewlum.
Lah ban kdew hangne, ka jingïa kynad hapdeng ki Garo bad kiwei pat ki jaitbynriew bym dei ki riewlum ka la sdang ha ka 09 tarik u Lber, 2026, hadien ba ki la pyrshah ïa ka jingwan thep kyrteng u MLA barim ka Phulbari u Estamur Mominin u bym dei u riewlum ban ïa aireng ha ka ilekshon MDC ha GHADC ka ban sa long shen.
