Jowai, Lber 12
Ki Waheh Shnong kiba hap hapoh ka Elaka Rymbai ki la kyntu ïa ka Jaiñtia Hills Autonomous District Council (JHADC) ban pynkloi noh ïa ka jingjied ïa u Dolloi hapoh katei ka Elaka.
Ïa ka jingïalang kaba ar jong baroh ki Waheh Shnong na ka Elaka Rymbai la pynlong ha ka 7 tarik Lber ha Khliehriat West Community Hall hapoh ka jingpynïaid jong u Bah Justine Dkhar, Waheh Shnong, Khliehriat West bad u Deibor Suchiang, Waheh Shnong, Ladrymbai Dongwah ban ïakren halor ka kam jied Dolloi thymmai jong ka Elaka.
Kane ka la wan long hadien ba ka jingïalang kaba nyngkong kaba la long ha ka 29 tarik Naiwieng 2025 kaba la ïakren ha kaba ïadei bad ka jingsahteng ban jied ïa u Dolloi ka Elaka bad ïa kaba la rah ban ïakren ha kane ka jingïalang kaba ar.
Ha katei ka jingïalang ba dang shen, baroh ki Waheh Shnong na ka Elaka Rymbai kiba la wan sha kane ka jingïalang ki la shim ïa ka rai ban kyrpad ïa ka JHADC bad ïa ki bor ba dei khmih ba kin pynkloi noh ha kaba ïadei bad ka jingjied ïa u Dolloi jong ka Elaka. Ki la kyrpad ruh ban shimkhia halor ki jingeh kiba kum ki Waheh Shnong bad ki nongshong shnong ka Elaka Rymbai ki ïakynduh namar ka jingpynslem ban jied ïa u Dolloi bathymmai.
Nalorkata, la kyrpad ruh ban bud ryntih ïa ka rukom kaba la leh slem bha jong ka Elaka Rymbai kaba ailad ïa ki kyrtong na baroh ki lai tylli ki Kur ba kin ïakhun ïa ka kam Dolloi khlem da kheiñ na kano-kano ka jingngeit niam.
