Kyntu u Coach ka Iraq ïa ka FIFA ban pynsangeh ïa ka jingïalehkai playoff

Shillong, Lber 12

U Coach ka Iraq u Gra-ham Arnold u la kyntu ïa ka FIFA ba kan pynsangeh shwa ïa ka jingïalehkai playoff jong ka Iraq kaba long shi bynta ka lympung ïaknieh ban ïoh rung sha ka World Cup.

Bun na ki nongïaleh-kai bad ki nongtrei ka kynhun jong ka Iraq kim lah ban leit jingleit mynta namar ka thma kaba nangjur kaba ktah ïa ka Iran. Namar ka jinglong jingman, ka kad liengsuiñ jong ka Iraq ka la khang haduh ka 1 tarik u Ïaïong, kumta ka kynhun kam lah ban ïalum lang ne ban leit sa da ka liengsuiñ na ka bynta ka jingïalehkai shabar.

Ha ka jingshisha ka Iraq ka dei ban ïakhun ïa ka playoff ha ka 31 tarik mynta u bnai ha Monter-rey na ka bynta ban ïoh rung sha ka World Cup. Ka kynhun kaba kan ïakhun pyrshah kan long ïa ka Suriname ne ka Bolivia.

Namar ba ka kynhun kam lah ban leit jingleit ne pynkhreh bha, u coach u la kyntu ïa ka FIFA ban pynsangeh noh ïa ka jingïalehkai khnang ba ki nongïalehkai kin lah ban ïalehkai hadien.

“Lada ka jingïalehkai kan ïaid shakhmat ha Mexico ngi don ïa ki jingeh ban mih na Baghdad,” la ong u Arnold uba na Australia.

“Kumba 60% na ki nongïalehkai jong nga ki ïalehkai ha Iraq, baroh ki nongïarap jong nga ki shong ki sah ha Iraq, baroh ki nongtrei ka koit ka khiah jong nga ki sah ha Qatar bad ngi don jingeh ban ïoh ïa ki visa Mexico ha kane ka khyllipmat,” u la bynrap.

Shuh shuh u Arnold ula ong ba u la shah pynbor ban sangeh ka jingkilanmet ha United States.

“Ka FIFA ka donkam ban shim ïa ka rai kham kloi halor kane namar kam long kaba ïahap ha kane ka por.”

U la ai jingmut ba ka Suriname bad ka Bolivia ki lah ban ïaid shakhmat ïa ki jingïalehkai playoff jong ki ha Monterrey ha ka 26 tarik mynta u bnai bad ka kynhun kaba jop ha katei ka jingïalehkai ka lah ban ïakhun pyrshah ïa ka Iraq ha America hashwa ka World Cup, ka ban long ha ka 11 tarik u Jylliew.

“Ka Bolivia bad ka Suriname ki lah ban ïalehkai mynta u bnai namar kim don jingeh ei ei ha ka liang ki liengsuiñ ne kano kano ka bynta, ki lah ban poi beit sha ka jaka kaba ki thmu bad ngi lah ban ïakhun pyrshah ïa ka nongjop.

“Ka kynhun nongjop kan sah bad ban ïalehkai ha ka World Cup bad kaba shah rem kan leit phai ïing.”