Mairang, Lber 12
Kum shi bynta ban ailad ïa ki samla ban pynpaw ïa ka sap bad ban pynshlur ïa ki ban shim bynta ha ki kam paidbah, ban ïakren halor ki polisi kiba ai jingmyntoi ïa ki samla pule bad ban ïatai halor ki mat kiba kongsan jong ka ri na ka liang ka Ministry of Youth Affairs and Sports ka Sorkar India ha ryngkat ka Nehu Yuva Kendra Sangathan (NYKS) ka la ïoh ban pynlong ïa ka rynsan Viksit Bharat Yuva Connect bad ka Youth Parliament 2026 kaba dei ruh ka District Nodal Round.
Ïa kane ka prokram la pynlong hapoh Mairang Presbyterian Science College ha ka shnong Mairang Sangshong Eastern West khasi Hills District halor ka phang “50 Years Of Emergency: Lesson For Indian Democracy”.
Ha kane ka Prokram la sakhi ïa ka jingwan ban ai jingkren da uwei na ki Content Creator ka Jylla u Bah Ferdinand Rani ha ryngkat ka jingïadonlang u Vice Principal u Bah S.Myrthong, ki nonghikai ha ryngkat ka jingwan ban ïashim bynta ki samla na kane ka District .
Shuh shuh ha kane ka sngi hashwa ka session ïatai, ki samla la ïoh ïa ka jingai jingmut bad jingkyntu na u Bah Ferdinand Rani ha kaba ula kyntu ïa ki samla ba lada ki kwah ban long kum ki IAS lane Engineer ne ki nonghikai bad kino-kino ba ki jied ha ka jingim ka jong ki, kaba kongsan hi ka long ba ki dei ban iai pyrshang bad ban don ka jingangnud bad ban ym duh jingkyrmen wat hapdeng ki jingeh khnang ba kin lah ban poi sha kata ka thong kaba ki thrang.
