Shillong, Lber 12
Hadien ka jingjop ïa ka Real Kashmir, ka Shillong Lajong kan pynkhreh sa ïa kawei pat ka jingïalehkai ha la ïing pyrshah ïa ka kynhun kaba dangkiew kyrdan thymmai ka Diamond Harbour FC ha ka sngi Saitjaiñ ha ka por 6:30 janmiet ha SSA Stadium, Shillong.
Te kumta kane ka klob ka la pynbna ba kan sdang ban die ïa ki tiket naduh mynta ka sngi Thohdieng ha kaba ïa kine lah ban ïoh na Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter.
Lah ban kdew ba ha ka jingïalehkai ba la lah, ka Lajong ka la lah ban pynliem ïa ka Real Kashmir da 2-1 kol. Te la khmih lynti ba katei ka jingïalehkai kan long kaba itynnad bad ban pynhun ïa ki nongpeitkai.
