Shillong, Lber 12
Ka Voice of the People Party (VPP) Youth Wing Ri-Bhoi Distrcit ka la dawa na u Deputy Commissioner, Chairman District Selection Committee, Ri-Bhoi ban pynbna noh ïa ka resol thoh exam jong ka DSC.
Ha ka ‘memorandom’ ba la phah sha u DC lyngba u Samla Barapbor Makri, President ka VPP Youth Wing, la dawa ïa ki bor ba dei peit ba kin pynkloi ban pynbna noh ïa ka resol na ka bynta ka eksamin thungkam jong ka District Selection Committee (DSC) Ri-Bhoi.
Ïa ka jingpynbna na ka bynta kine ki kam ka DSC ha Ri-Bhoi la pynmih ha u snem 2024, bad ïa ka jingthoh eksam la pynlong naduh ka 17 u Kyllalyngkot 2026 haduh ka 14 tarik Rymphang 2026.
“Bun ki nongïakhun ki la ap khmih lynti da ka jingsngewkhia ban ïoh noh ïa ka resol khnang ba ki bynta kiba hadien jong ka jingpynrung kam kin ïaid shakhmat khlem da pynslem, khlem da donkam shuh lada jia ba ki la ïoh ha kane ka kam,” la ong ka VPP.
Ka VPP ka la kdew ruh ba ka East Khasi Hills District kaba dei ka District kaba bun briew tam ha ka jylla Meghalaya, ki la lah ban pynbna ïa ka resol tang hapoh shi taïew ïa ki eksamin ba la thoh da ki samla. Kumta ka VPP ka la kyrpad jur ïa ki bor ba dei peit jong ka Ri-Bhoi District ba kin sngewbha ban pyrkhat ban pynkloi noh ïa ka jingpynbna ïa ka resol DSC.
Ka VPP ka la ong ruh ba ka jingpynmih ïa ki resol ha ka por kaba biang kan ïarap shibun ïa ki samla ba ïakhun ïa kane ka kam thungkam ha ka DSC.
“Ngi kyrmen skhem ba ki bor ba dei peit kin peit bniah ïa kane ka kam bad kin shim ïa ki sienjam ba donkam ban pynmih ïa ka resol katba lah” la bynrap ka VPP.
