Jowai, Lber 12
Ki shakri niam hapoh ka Raij Jowai, kynthup naduh u Dolloi, Pator, Langdoh, Sangot, ki Kñi jong ki Phra Kur Phra Kmai ryngkat ki Waheh Wasian ka Raij ha ka 10 tarik Lber ki la mih shakhmat ka Ïew ka Syiem ban pyndep ïa ka lehniam ‘Kbai Mooknor’.
Ïa ka lehniam Kbai Mooknor, la leh hashuwa ban pyndep ïa ka lehniam Thoh Langdoh.
Shuwa ba ki shakri niam kin mih shakhmat ka Ïew ka Syiem, ka la don ka jingïakynduh lang jong ki shakri niam ha Ïung Langdoh ha kaba u Dolloi ka Elaka Jowai, Ma Puramon Kynjing u la pashat ki kyntien sngewnguh bad ha kajuh ka por u la pynsngew ïa ki kam ba ka Dorbar Niam kan pyndep mynta u bnai. Ha kane ka Kbai Mooknor, na ka liang u Chutia u la ai ki jingpynbna sha ki nongshong ïew shonghat, ki nongleit ïew leit hat ba ka lehniam hapoh ka Raij Jowai ka la sdang naduh mynta ka sngi.
U la pynkynmaw ruh ïa ki khun ka raij ka shnong ïa ki adong niam adong Blei bad kyrpang ruh ba ym bit ban leh kino-kino ki kam da kaba pom, daiñ bad pynmong ïa ka mei mariang ha ka sngi Thoh Langdoh kaba long ka sngi sang sngi katkum ka jingngeit ki khun ka Niamtre.
