Mairang, Lber 12
Ka tnad Social Welfare ka Sorkar Jylla lyngba ka ophis jong ka District Social Welfare Officer, West Khasi Hills District ha ryngkat ka ophis jong ka District Sankalp Hub For Empowerment of Women, Eastern West Khasi Hills District ha ka 10 tarik Lber ka la rakhe ïa ka sngi kyrpang ki kynthei kaba la tip kum ka ‘International Women’s Day’ ha ryngkat ka jingrakhe ïa ka jingdap 11 snem ka skhim ‘Beti Bachao Beti Padhao’ (BBP Scheme) ha Tirot Sing Memorial Hall Pyndengumïong, Mairang.
Ha kane ka prokram la wan ban ïadonlang ka Kong I. Warjri, Assistant Director MATI, Shillong kum ka Kongsan ha ryngkat ka ka Kong P. Kharkongor, HOD Social Work, Womens College Shillong kum ka Symbud Kongsan, ka DSWO-WKH, ka Kong D.W. Pakyntein, ka Kong S. Kharkongor DCPO, u OC ka Mairang Police Station, Bah S. Kharjanaki, nongïalam ka Blossom CLF ha ryngkat ki longkmie bad ki khynnah skul. Ha kane ka prokram la ïoh ruh ban pynkup burom ïa ki samla kynthei kiba la ‘pass’ bha ha ki eksamin bapher-bapher bad ïa ki 5 ngut ki samla kynthei kiba la wanrah nam ïa ka Jylla lyngba ka jingleit shim bynta jong ki ha ki jingïakop bapher-bapher kiba la pynlong shabar ka Jylla bad ka Ri kiba la ïoh ïa ka khusnam ‘Gold’, ‘Silver’ bad ‘Bronze’. Kane ka jingpynkup burom ka long ban ai mynsiem shuh-shuh ïa ki, ba kin nang lehbha bad ba kin wanrah nam ïa ka District ka Jylla bad ka ri.
Nalorkata, la ïoh ban sam ïa ki Reusable Sanitary Pads sha ki 300 ngut ki khynnah skul.
Ka Kong I. Warjri haba kren kum ka kongsan ha kane ka sngi ka la ai ka jingpynshai khamtam sha ki khynnah samla kiba dang pule ba ki dei ban kiar na ka jingïalang samla khynnah da kaba ka la ban jur ba ynda ki la palat ïa ka 20 snem ka rta ka lah dei ka por ba ki la lah ban pyrkhat ïa ka kam shongkha. Shuh shuh ka la ong ruh ba ka jingïalang samla ne ka jingïalang paralok hapdeng u shynrang bad kynthei ka dei ban don ka jingïatip ha ïing ha sem khamtam ha khmat ki kmie ki kpa.
Ha kane ka sngi ïa kane ka prokram la pynshit pynshngaiñ da ki jingrwai bad ki jingshad na ki khynnah skul ha ryngkat ka skit kaba lyngkot na ka Blossom CLF.
